Նորածին որդուն կորցրած՝ 30-ամյա ծննդկան Սիմա Եփրեմյանը հղիության ողջ ընթացքում որեւէ բարդություն, խնդիր չի ունեցել: Այս մասին NEWS.am-ի թղթակցի հետ զրույցում վստահեցրեց ծննդկանի հղիությունը հաշվառման վերցրած եւ վարած Ազատուհի Ղազարյանը, որն աշխատում է Արտաշատի բժշկական կենտրոնում:
«Սիմա Եփրեմյանը դոպլեր հետազոտության էլ է ենթարկվել, պտուղը որեւէ խնդիր չի ունեցել: Հղիության ողջ ընթացքում էլ հղին որեւէ խնդիր չի ունեցել»,- ասաց բժշկուհին:
Ավելի վաղ մահացած նորածնի հայրը Մակար Անտոնյանը մեզ հետ զրույցում պնդել էր, որ երեխայի մահվան պատճառը բժշկական սխալն է եղել: Հոր խոսքով, բժիշկները տեղյակ են եղել, որ պտղի դիրքը տոտիկային է եղել եւ պետք էր կեսարյան հատում անել, սակայն հերթապահ բժիշկն այլ որոշում է կայացնում:
«Արտաշատի հիվանդանոցի բժիշկները երեխուս կյանքը կերան: Ամսի 30-ին ծնվել է երեխաս, ժամեր անց Երեւան ենք տեղափոխել եւ 7 օր անց տղաս մահացավ... պորտալարն էր փաթաթված, գլխուղեղի վնասվածք էր ստացել եւ ամբողջը բժիշկների պատճառով»,- ասել էր Մակար Անտոնյանը:
Երեխայի մահվան պատճառը դեռեւս պարզ չէ: Ծնողները պատրաստվում են հաղորդում ներկայացնել ոստիկանություն: