Փաստը, որ Թուրքիայի վարչապետը էլեկտրոնային փոստով հրավերներ է հղել Հայաստանի հանրային-քաղաքական հատվածի ներկայացուցիչներին՝ մասնակցելու Վանի Աղթամար կղզում Սուրբ Խաչ եկեղեցում կայանալիք պատարագին, խուճապի արտահայտություն է, մամուլի ասուլիսում հայտարարել է Ազգային Ժողովի ՀՅԴ խմբակցության պատգամավոր Ալվարդ Պետրոսյանը:
«Ես Թուրքիայի վարչապետից հրավեր չեմ ստացել եւ վիրավորված չեմ այդ փաստից: Չեմ կարծում, թե Էրդողանը պատարագին կհրավիրեր Դաշնակցություն կուսակցության ներկայացուցչին: Էրդողանի կողմից Հայաստանի հասարակական-քաղաքական հատվածի ներկայացուցիչներին հրավերների ուղարկումը խուճապի արտահայտութուն է: Նա հասկացել է, որ իրենց ծրագիրը ձախողվել է:, եւ փորձել է այդ քայլով կարգավորել իրավիճակը, սակայն ուշացել է»,- ասել է Պետրոսյանը:
Նրա կարծիքով, Թուրքիան սխալ է արել՝ Սուրբ Խաչի վրա խաչ չտեղադրելու որոշում կայացնելով: «Թուրքիան սխալվել է, իսկ մենք պետք է օգտվենք այդ սխալից եւ շարունակենք պահպանել մեր դիրքորոշումը: Հայ-թուրքական հարաբերություններում չկա այնպիսի հարց, որը վաղեմության ժամկետ ունենա»,- ասել է նա: Խոսելով հայ-թուրքական հարաբերությունների մասին՝ Պետրոսյանը հայտարարել է, թե դրանցում որոշակի առաջընթաց կա, քանի որ թուրքական հանրությունը սկսել է մտածել Հայոց ցեղասպանության հարցի շուրջ: