Թուրքիայի կողմից Սիրիայում ռուսական «Սու-24»-ը խոցելուց հետո Ռուսաստանի պատժամիջոցների պատճառով Թուրքիայում կաշեգործության սեկտորը խիստ ծանր վիճակում է հայտնվել։
Թուրքական Hurriyet-ի փոխանցմամբ՝ Ստամբուլում կաշվե հագուստների մեծածախ կենտրոն համարվող Զեյթինբուռնու թաղամասում ամեն օր կաշվե իրերի խանութներ են փակվում։
Կաշվե իրեր արտադրող ու վաճառող գործարարները նշել են, թե Ռուսաստանի պատժամիջոցների պատճառով իրենք սնանկության եզրին են հասել։
«Եթե նախկինում Զեյթինբուռու թաղամասում վարձով խանութ գտնելն անհնար էր, ապա հիմա ամեն օր նոր խանութներ են փակվում։ Կաշեգործությունը 80 տոկոսանոց անկում է գրանցել։ Ռուսաստանի պատժամիջոցների պատճառով կաշվե բաճկոնների ու իրերի գները ընկել են 3 անգամ։ Եթե կաշվե բաճկոնը վաճառում էինք 300 դոլարով, ապա հիմա հազիվ ենք 100 դոլարով գնորդ գտնում».-ասել է Թուրքիայի կաշեգործների խորհրդի անդամ Նուրեթին Այդընը։