![](img/news/31/38/95/default.jpg)
Ավետիսյանների սպանության գործով ցուցմունքներում որոշակի հակասություններ կան։ Հայաստանում ՌԴ ԱԴԾ Սահմանային վարչության Գյումրիի սահմանապահ ջոկատի պետի տեղակալ Սերգեյ Մերզլիկինը դատարանում Ավետիսյանների սպանության գործով ցուցմունքում ասել է, որ իրեն փախուստի մասին հայտնել է 102-րդ ռազմաբազայի պետը, եւ հանձնարարվել է շան օգնությամբ փնտրել զինվորին։ Շունը գտել է հետքը եւ բերել Շիրակացի փողոցի վրա գտնվող տունը։ Ընդ որում, վկան պնդում է, որ մինչեւ վերջին պահը փնտրել են դասալիքի, բայց ոչ մարդասպանի։ «Թեպետ ես ենթադրում էի, որ մարդասպանի եւ դասալիքի միջեւ կապ կա»,- ասել է վկան։
Հարցը, թե կոնկրետ որ ժամին է շունը նրանց բերել Ավետիսյանների տուն, դեռեւս շրջանցվում է։ Վկան հայտնել է, որ սպանության մասին ինքն իմացել է «այն ժամանակ, երբ բոլորը», այսինքն՝ մոտ 12։30-ի սահմաններում ոստիկանությունից։ Հիշեցնենք, որ սպանությունը տեղի էր ունեցել առավոտյան մոտ ժամը 6-ին։ Ընդ որում, վկան, իր իսկ ասելով, իրավիճակը գնահատելով որպես սահմանապահ, հայտնեց, որ դասալիքը թափառել է փողոցներով, ինչը խոսում է այն մասին, որ որոնվողը վատ գիտեր քաղաքը։ Տան մոտ շունը բազմաթիվ հետքեր էր գտել, ինչը վկայում է այն մասին, որ որոնվողը պտտվել է տան շուրջը՝ չիմանալով, թե ուր գնալ։
Նույն վկայի խոսքով՝ հետախուզման սկզբից հայ իրավապահները տեղյակ են եղել դասալքության մասին։ Սակայն ստացվում է, որ տան մոտ «բազմաթիվ հետքերի» մասին տեղեկությունը նրանց չեն հայտնել։ Հակառակ դեպքում, սպանության մասին հայտնի կդառնար ավելի վաղ։ Ստացվում է, որ չնայած բարձր մակարդակի համագործակցության մասին պնդումներին, մի քանի ժամ կորցրել են։
«Նա վախեցած էր, բայց այն, որ իրեն ձերբակալել են, նա հասկանում էր»,- ասել է վկան՝ խոսելով ձերբակալության պահի մասին։ Ընդ որում, նա խոստովանել է, որ սահմանի խախտում տեղի չի ունեցել։