![](img/news/03/14/49/default.jpg)
Աղթամարի Ս.Խաչում պատարագ մատուցելուց մեկ օր առաջ, Վանի Թամարա հյուրանոցում կազմակերպված հայկական խոհանոցի երեկոն բավականին հետաքրքրություն էր առաջացրել թե թուրք լրագրողների, թե Վան հրավիրված արտասահմանցի դիվանագետների համար:
Վանում գտնվող NEWS.am-ի թղթակցի փոխանցմամբ` հատուկ Հայաստանից հրավիրված խոհարարը, թուրքերին զարմացրել է ոչ միայն համեղ հայկական ճաշատեսակներ պատրաստելու հմտությամբ, այլ նաեւ` «դուխով»:
Օրինակ` թուրքական TRT հեռուստաընկերության լրագրողը տեսախցիկի առաջ համտեսում էր հայ խոհարարի պատրաստած տոլման եւ բարձրաձայն ասում, թե այն շատ համեղ է: Ավելի հետաքրքիր էր թուրք լրագրողի հարցազրույցը հայ խոհարարի հետ, որի ժամանակ թուրք լրագրողի այն հարցին, թե ինչպես է իրեն զգում հայաստանցի խոհարարը Վանում, խոհարարը հետեւյալ կերպ պատասխանեց. «Ես ինձ հանգիստ եմ զգում, ես իմ հողերում եմ գտնվում: Վանը հայկական հող է», -պատասխանեց հայազգի խոհարարը` պնդելով, թե թուրքերի համտեսած տոլման հայկական ազգային ուտեստ է:
Նշենք, որ Թամարա հյուրանոցում տեղավորված Թուրքիայում աշխատող արտասահմանյան դիվանագետները եւ թուրք պաշտոնյաները նշեցին, թե բավականին հավանել են հայկական ուտեստները: Դրա վկայությունը` հայկական երեկոյի ավարտին դատարկ ափսեներն էին: