Վանի Ախթամար կղզու Սուրբ Խաչ եկեղեցում անցկացվող պատարագը խաղ չէ եւ դուրս է դրանից։ Եթե սա Թուրքիայի արտաքին քաղաքականությանը բնորոշ խաղ լիներ, ապա հասարակությունը դրա դեմը կառներ։ «Երկիր Մեդիա» հեռուստաընկերության եթերում այս մասին հայտարարել է թուրքական Sabah պարբերականի թղթակից Յավուզ Բայդարը։
«Այստեղ եմ եկել որպես լրագրող ու հայ-թուրքական հարբերությունները բարելավող ցանկացող եւ դրա համար ամեն ջանք գործադրող մի անձ։ Ամեն ինչ կանեմ, որ հայ թուրքական հարբերությունները լավանան եւ շարունակեն իրենց ընթացքը նորմալ հունով»,- ասել է Բայդարը։
Նա սխալ է համարել եկեղեցու գմբեթին խաչ չտեղադրելը, սակայն հույս է հայտնել, որ Թուրքիան կհասկանա իր սխալները եւ կարճ ժամանակահատվածում կուղղի դրանք ու կտեղադրի խաչը։
Նշենք, որ Յավրուզ Բայդարը երկար տարիներ հոդվածներ է հրապարակել Թուրքիա-Հայաստան հարաբերությունների մասին: Բազմիցս այցելել է Հայաստան, մասնակցել լրագրողների փոխանակման ծրագրերի:
Նշենք, որ պատարագին մասնակցում է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է: Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի: