Վանի Աղթամար կղզու Սուրբ Խաչ եկեղեցում սեպտեմբերի 19-ին կայացած պատարագին մասնակցել են Թուրքիայում Գերմանիայի դեսպանը, ԱՄՆ դեսպանատնից եւ հյուպատոսարանից 3 ներկայացուցիչ, ինչպես նաեւ Շվեդիայի եւ Ֆրանսիայի հյուպատոսության ներկայացուցիչները: NEWS.am-ի թղթակցի հետ զրույցում այդ մասին հայտնել է Պոլսո Հայոց պատրիարքարանի հոգեւոր խորհրդի առաջնորդ, ծայրագույն վարդապետ Թաթուլ Անուշյանը:
Անուշյանը նշեց նաեւ, որ պատարագին բազմաթիվ թուրք պաշտոնյաներ են մասնակցել, մասնավորապես Վանի եւ Գեւաշի քաղաքապետերը, Գեւաշի քայմաքամը, Թուրքիայի տուրիզմի եւ մշակույթի նախարարության թանգարանների եւ հնությունների վարչության տնօրենը: «Վանի նահանգապետը պատարագից 3 օր առաջ այցելել է Աղթամար` անձամբ ստուգելու կատարվող աշխատանքները, իսկ Պատարագին չի մասնակցել, քանի որ մտածել է, թե իրեն հսկող անվտանգության աշխատակիցների ներկայությունը եւ համապատասխան միջոցառումները կխանգարեն կրոնական արարողությանը»,- նշեց վարդապետ Թաթուլ Անուշյանը:
Նշենք, որ Աղթամարի Սուրբ Խաչի պատարագին ներկա էր նաեւ Վանի նահանգային ոստիկանապետը:
Ինչպես ավելի վաղ հայտնել էր NEWS.am-ը, սեպտեմբերի 19-ին Վանի Աղթամար կղզու Սուրբ Խաչ եկեղեցում գրեթե հարյուրամյա դադարից հետո պատարագ է մատուցվել: Թուրքական իշխանությունները, սակայն, խաչ չեն տեղադրել եկեղեցու գմբեթին: Խաչը բերվել եւ տեղադրվել է եկեղեցու հարեւանությամբ: Դա պատճառ է դարձել, որ բազմաթիվ հայեր հրաժարվեն այցելել կղզի: Վանի առեւտրա-արդյունաբերական պալատի նախագահ Զահիր Քանդաշօղլուն հայտնել է, որ Վան այցելելու ցանկություն հայտնածների 90 տոկոսը հրաժարվել է իր մտքից՝ խաչը չտեղադրելու որոշումից հետո:
Հատկանշական է, որ հայ լրագրողների մի խումբ պատարագի ժամանակ փայտե խաչեր է բարձրացրել ի նշան բողոքի խաչը չտեղադրելու որոշման դեմ:
Նշենք, որ Աղթամարի Սուրբ Խաչ եկեղեցում ավարտված պատարագին մասնակցել է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է: Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի:
