Աբսուրդ ու անմտություն են խոսակցություններն այն մասին, թե ՀՀՇ-ում զտման գործընթաց է տեղի ունենալու: Այս մասին NEWS.am-ի թղթակցի հետ զրույցում ասաց ՀՀՇ վարչության փոխնաագահ Սամվել Աբրահամյանը՝ անդրադառնալով մամուլում տարածված այն տեղեկություններին, ըստ որի՝ 2012 թվականի խորհրդարանական ընտրություններին նախապատրաստվելու շրջանակներում ՀՀՇ-ն մտադիր է մոտ ապագայում սկսել սեփական շարքերի լայնամասշտաբ զտում եւ ներկայումս կուսակցության վերնախավը, Տեր-Պետրոսյանի գլխավորությամբ, քննարկում է միջոցառման տեխնիկական մանրամասները:
Սամվել Աբրահամյանը վստահեցրեց, որ ՀՀՇ-ն լիբերալ կուսակցություն է, եւ այդ ուժի շարքերում երբեք զտումներ չեն եղել եւ չեն էլ լինի: «Զտում՝ նշանակում է, որ կոնկրետ ծրագրով, առանց որեւէ պատճառի, պետք է մարդկանց հեռացնենք կուսակցությունից: Բայց որեւէ մեկը չի կարող ցույց տալ դեպք, երբ ՀՀՇ վերջին համագումարից հետո մինչեւ այժմ ՀՀՇ որեւէ անդամ հեռացված լինի կուսակցությունից»,- նկատեց Աբրահամյանը: Ինչ վերաբերում է Կարապետ Ռուբինյանին, ապա նա, ինչպես ՀՀՇ վարչության փոխնախագահը հիշեցրեց, կուսակցությունից հեռացել է սեփական դիմումի համաձայն:
ՀՀՇ փոխնախագահը նշեց, որ կուսակցությունում այժմ ընթանում է մեկ այլ գործընթաց՝ վերահաշվառվում են կուսակցության անդամները: «ՀՀՇ հանրապետական խորհրդի որոշմամբ՝ կատարվում է վերահաշվառում: Իսկ վերահաշվառում չի նշանակում զտում: Վերահաշվառում՝ նշանակում է, որ ՀՀՇ յուրաքանչյուր անդամ վերահաստատում է իր անդամությունը կուսակցությանը: Ցանկացած անձ, այդ թվում եւ Կարապետ Ռուբինյանը, կարող է վերահաստատել իր անդամությունը եւ նոր քարտ բացվի նրա անունով»,- ասաց նա: Սամվել Աբրահամյանը վստահեցրեց, որ վերջին երեք ամիսների ընթացքում կուսակցության շարքերը համալրվում են եւ վերջերս կուսակցությանն անդամագրվելու շուրջ 100 դիմում է ստացվել: