![](img/news/32/42/47/default.jpg)
Տագնապահարույց լուրերը Երեւանով մեկ տարածվում են հենց պաշտոնական տեղեկությունների բացակայության պատճառով: Այս մասին ապրիլի 26-ին ԱԺ-ում հայտնել է ընդդիմադիր պատգամավոր Նիկոլ Փաշինյանը՝ խոսելով նախօրեին Երեւանի Հալաբյան փողոցում ուղեւորատար ավտոբուսի պայթյունի մասին:
«Ես չեմ ասում, թե իրավապահ մարմինները ոչինչ չեն անում: Ես ընդամենը ասում են, որ ավելի քան 12 ժամ է անցել ու այդ ժամկետը առավել քան բավարար է, որպեսզի իրավապահ մարմինները կատարվածի մասին գոնե նախնական վարկած ներկայացնեին: Մանավանդ հաշվի առնելով փողոցներում դիտարկման տեսախցիկների առկայությունը: Ժամանակին արված հայտարարությունները կօգնեին կանգնեցնել այն լուրերը, որոնք երկրաչափական պրոգրեսիայով տարածվում են քաղաքում »,- նշել է Փաշինյանը
Հիշեցնենք, որ երեկ երեկոյան՝ ժամը 21:51 –ին ուղեւորատար ավտոբուսում պայթյուն է որոտացել: Այս պահի դրությամբ հայտնի է երկու զոհերի ու ութ տուժածների մասին: Հալաբյան փողոցում շարունակվում են քննչական միջոցառումները: