Երեւանի Հալաբյան փողոցում ապրիլի 25-ին երեկոյան ավտոբուսի պայթյունի հետեւանքով տուժած 15-ամյա Անահիտ Միքայելյանը նստած է եղել վարորդի հետեւի նստարանում, իսկ պայթյունը եղել է ավտոբուսի աջ մասում՝ իրենից հետեւ:
«Կոնկրետ չեմ կարող ասել, թե որ նստարանի մոտ է եղել պայթյունը: Հիշում եմ միայն, որ իմ հետեւում մարդ չկար նստած, իսկ դրա հաջորդ նստարանին ինձ հասակակից տղաներ են եղել, որոնք ինձ հետ «Թումո»-ի կանգառից նստել էին: Ամեն ինչ շատ արագ տեղի ունեցավ, արթանացա, աչքերս բացեցի, տեսա՝ վրաս ապակու կտորներ էին ընկած: Իմ կողքին նստած տղան լավ էր, ինքն ինձ առաջինը օգնեց, ապա անցորդները պատուհանից ինձ հանեցին ու տեղափոխեցին հիվանդանոց»,- NEWS.am-ի թղթակցի հետ զրույցում պատմել է Անահիտ Միքայելյանը, որն այս պահին գտնվում է «Արմենիա» բժշկական կենտրոնում:
15-ամյա աղջիկը պատմել է նաեւ, որ աչքերը բացելուն պես իր դիմաց տեսել է ավտոբուսի դռան մոտ կանգնած մի տղամարդու, որը սպասում էր կանգառում իջնելուն:
«Պայթյունը եղել է հենց այդ մասում, որտեղ այդ մարդը կանգնած էր, միջին տարիքի տղամարդ էր, նա տեղում մահացավ: Վարորդին էլ եմ տեսել, դեմքն ամբողջությամբ մուր էր, ճակատային հատվածից էլ արյուն էր գալիս, բայց կարողանում էր խոսել, քայլել»,- ասել է Անահիտ Միքայելյանը:
Հիշեցնենք, որ պայթյունը տեղի է ունեցել թիվ 63 երթուղին սպասարկող ավտոբուսի մեջ: Կա 2 զոհ եւ 8 տուժած: Մահացածներից մեկի ինքնությունը պարզվել է, մյուսինը դեռ ճշտվում է:
Փաստի առթիվ ՀՀ քրեական օրենսգրքի 279-րդ հոդվածի 3-րդ մասի հատկանիշներով (Սպառողների կյանքի կամ առողջության անվտանգության պահանջներին չհամապատասխանող ծառայություններ մատուցելը, եթե այդ արարքներն անզգուշությամբ առաջացրել են երկու կամ ավելի անձանց մահ) հարուցվել է քրեական գործ: