Երեւանի Հալաբյան փողոցում ապրիլի 25-ին 63 համարի երթուղային ավտոբուսի պայթյունից տուժած 53-ամյա Հասմիկ Մելքոնյանն իր բարեկամուհու՝ 37-ամյա հղի Անուշ Եղիկյանի հետ նստած է եղել պայթյունի ենթադրյալ մեղավորի ուղղությամբ, սակայն նրա մոտ ոչ մի կասկածելի բան չի նկատել:
«Պայթյունի պահը չեմ հիշում, Անուշի հետ եմ եղել ավտոբուսում: Ոչինչ չեմ լսել, տեսել, միայն զգացի, որ թուլացա ամբողջ մարմնով, ձեռքերս չէին կառավարվում, նույնիսկ գոռում էի եւ իմ ձայնը չէի լսում: Պայթյունից հետո մութ էր, ոչինչ չէր երեւում, շուռ եկա կողքի` տեսնեմ ովքեր կան, տեսա պատուհանները չկան, վարորդը չկա, ուզում էի դռնից դուրս գալ, դռնից մահացածի մարմինն էր կախված: Սկսեցի գոռալ՝ օգնեցեք, տեսա՝ դիմացի մայթին մեքենաներ են կանգնել ու դեպի մեզ են վազում մարդիկ, եկան օգնեցին, դուրս եկանք»,-պատմել է կինը:
Հասմիկ Մելքոնյանը դեպքի օրն իր բարեկամուհու հետ ատամնաբուժարան էր գնացել: Նշենք, որ 37-ամյա հղիի վիճակը կայուն է, նա ստացել է թոքերի սալջարդ եւ ցավեր ունի որովայնի շրջանում:
Հիշեցնենք, որ ապրիլի 25-ին Երեւանի Հալաբյան փողոցի թիվ 11 շենքի մոտ ավտոբուս էր պայթել: Կա 2 զոհ եւ 8 տուժած:
Նախնական տեղեկություններով, դեպքի վայրում հայտնաբերվել է բջջային հեռախոսային քարտ, որի բաժանորդի ինքնությունը պարզվել է: 55-ամյա Ռուբեն Բալյանը ՀՀ քաղաքացի է, նախկինում երկու անգամ դատված։ Նրա բնակության վայրում օրենքով սահմանված կարգով ապրիլի 26-ին իրականացված խուզարկությամբ հայտնաբերվել է «տրոտիլ» տեսակի պայթուցիկ նյութ, պայթուցիչ սարքեր (դետոնատոր) եւ տարբեր տեսակի էլեկտրասարքավորումներ։
«Տրոտիլ» տեսակի պայթուցիկ նյութի տարրեր, հետքեր հայտնաբերվել են նաեւ ավտոբուսի եւ դեպքի վայրի զննությամբ առգրավված փորձանմուշների վրա, ինչը հիմնավորվել է նշանակված փորձաքննության նախնական եզրակացությամբ:
Քննությունը շարունակվում է: