![](img/news/32/46/57/default.jpg)
Տպավորություն է, որ եթե իշխանությունը ասի, որ արեւը արեւելքից է ծագում եւ արեւմուտքում է մայր մտնելու, ընդդիմությունը անմիջապես կառարկի, որ իշխանությունը ամեն ինչ հարմարեցնում է իրեն, իր վերարտադրության նպատակներին: Այս մասին, այսօր՝ ապրիլի 28-ին, ԱԺ-ում ընտրական օրենսգրքի քննարկման ժամանակ նշել է ԱԺ փոխնախագահ Հերմինե Նաղդալյանը՝ հավելելով, որ ընդդիմության եւ իշխանության միջեւ խոսակցությունն անընդհատ նմանվում երկու խուլերի խոսակցության, ամեն մեկն իրենն է ասում, ոչ մեկին չի լսում:
Նա հիշեցրել է ՀՀ նախագահ Սերժ Սարգսյանի խոսքը, թե ընտրությունների որակը ավելի կարեւոր է, քան արդյունքը եւ նկատել, որ նախկինում երբեք իշխանության ղեկավարը նման խնդիր չի դրել:
«Հիմա մենք ասում ենք, որ ընտրական օրենսգրքի հիմքում դրված են մեխանիզմներ, որ կեղծիքներ թույլ չեն տալիս։ Շատերը մտածում են, թե որտեղ է թաղված շան գլուխը, որ փուլում ինչպես են կեղծիքներն անելու: Ժողովո՛ւրդ, հանեք ձեր միջից կասկածի որդը, որը թույլ չի տալիս ձեզ հանգիստ դատել եւ տեսնել այն, ինչ կա իրականության մեջ: Հերթական անգամ իմ մոտ տպավորությունն է ստեղծվում, որ ընդդիմությունն ի սկզբանե ոնց որ թե տեղյակ է՝ պատրաստվում է ընտրությունները տանուլ տալուն եւ հիմքեր է ստեղծում դիմացինին՝ իշխանությանը մեղադրելու համար»,-ընդգծել է Նաղդալյանը: