Ցանկացած դեպք, երբ քաղաքական կուսակցության անդամը ենթարկվում է բռնության, վիրավորանքների, ծեծի կամ ձերբակալման, մտահոգության առիթ է մեզ համար: Այս մասին մայիսի 5-ին, ԱՄՆ պետքարտուղարությունում հերթական ճեպազրույցի ժամանակ նշել է Պետքարտուղարության փոխխոսնակ Մարկ Թոները՝ անդրադառնալով Թուրքիայի խորհրդարանում հայ պատգամավոր Կարո Փայլանի դեմ հարձակումների ու բռնությունների փաստին:
Մասնավորապես, նրան հարցրել են. «ԱՄՆ հայ դատի հանձնախումբը Թուրքիայում ԱՄՆ դեսպան Ջոն Բասին կոչ է արել հրապարակավ Ամերիկայի մտահոգությունը հայտնել Թուրքիայի խորհրդարանի հայ պատգամավոր Կարո Փայլանի անվտանգության սպառնալիքների կապակցությամբ: Դուք հետեւո՞ւմ եք այս իրավիճակին, որեւէ մեկնաբանություն կարո՞ղ եք անել այս խնդրի շուրջ»:
Ի պատասխան Թոներն ասել է, որ չի տիրապետում մանրամասն տեղեկությունների։
«Ես ծանոթ չեմ կոնկրետ այդ անձի եւ այդ դեպքի մանրամասներին, պետք է ուսումնասիրեմ հարցը՝ ավելի անկեղծ պատասխան տալու համար:
Ակնհայտ է, որ ցանկացած դեպք, երբ քաղաքական կուսակցության անդամը ենթարկվում է բռնության, վիրավորանքների, ծեծի կամ ձերբակալման, մտահոգության առիթ է մեզ համար, բայց քանի որ ես այս հարցի շուրջ մանրակրկիտ տեղեկությունների չեմ տիրապետում, կհրաժարվեմ հետագա մեկնաբանություններից»,- ասել է Թոները:
Նշենք, որ Թուրքիայի խորհրդարանում քրդերին պատգամավորական անձեռնմխելությունից զրկելու օրինագծի քննարկումների ժամանակ իշխող կուսակցության պատգամավորները 3 օր շարունակ հարձակվել են քուրդ պատգամավորների վրա եւ ծեծկռտուք սարքել։ Իսկ մայիսի 3-ին իշխող կուսակցության անդամների գլխավոր թիրախը եղել է Կարո Փայլանը։
Ավելի ուշ Կարո Փայլանը հայտարարել է, որ իշխող «Արդարություն եւ զարգացում» կուսակցության ներկայացուցիչները կանխամտածված իրեն թիրախ են ընտրել ծեծկռտուքի ընթացքում։
