Գյումրիում սպանված Ավետիսյանների իրավահաջորդների ներկայացուցիչները Ռուսաստանից բարոյական վնասի փոխհատուցում կպահանջեն։ Այս մասին NEWS.am-ի թղթակցին հայտնել է տուժած կողմի փաստաբան Լուսինե Սահակյանը։

Փաստաբանը հրաժարվել է մանրամասներ ներկայացնել՝ նշելով, որ քանի որ քաղաքացիական հայցը դեռ ներկայացված չէ, իսկ իրենք մտադիր են դա անել առաջիկա նիստում, մանրամասներ հայտնելու համար դեռ շուտ է։

Գյումրիայում Ավետիսյանների սպանության գործով այսօրվա նիստում հրապարակվել են երեք հիմնական վկաների ցուցմունքները։ Նրանք բոլորը 102-րդ ռազմաբազայի նախկին ծառայողներ են, որոնք հիմա Հայաստանի սահմաններից դուրս են գտնվում։ Վկաներ Նիկիշինը, Տարասովը եւ Մալցեւը նշել են, որ ընտանեկան հանգամանքների բերումով չեն կարող ներկա լինել եւ գրավոր հայտնել են, որ չեն կարող ժամանել։ Հաշվի առնելով, որ դատարանը նրանց բերման ենթարկելու իրավունք չունի, հրապարակվել են հետաքննության ընթացքում տրված ցուցմունքները։

Դրանից զատ, ամբաստանյալ Վալերի Պերմյակովի փաստաբան Էդուարդ Աղաջանյանը միջնորդել էր Պերմյակովից փաստաբանի ներկայությամբ իրեր առգրավելու գործընթացը անթույլատրելի ճանաչելու համար՝ հաշվի առնելով, որ դրանք ավելի վաղ առգրավել էին սահմանին ձերբակալելիս։ Դատավորը դեռ այդ հարցով որոշում չի կայացրել։