Պոլսո Հայոց պատրիարքարանը չի կարող արգելք հանդիսանալ, որպեսզի թուրքական իշխանությունները թույլ չտան նամազ անցկացնել Անիի մայր տաճարում, քանի որ եկեղեցին Թուրքիայի տիրապետության տակ է: Այս մասին NEWS.am-ի թղթակցի հետ հեռախոսազրույցում ասաց Պոլսո Հայոց պատրիարքական ընդհանուր փոխանորդ, արքեպիսկոպոս Արամ Աթեշյանը: Նա նշեց, որ թուրքական պետությունն էլ չի կարող արգելք հանդիսանալ, քանի որ «դա անհատական աղոթք է լինելու եւ ազգայնականներն ամեն տեղ կարող են աղոթել, բայց ոչ թե աղոթքը այլ բանի վերածել»:
NEWS.am-ը հիշեցմանը, որ խոսքը զանգվածային նամազի մասին է, որին, ըստ թուրքական լրատվամիջոցների, պետք է մասնակցի շուրջ 5 հազար մարդ, պատրիարքը արձագանքեց. «Հասկանալի է, բայց պատրիարքարանն ի՞նչ կարող է անել»: Նա նաեւ հավելեց, որ թուրքական թերթերը նույնպես նշված թույլտվության մասին փորձել են ճշտել Պոլսո պատրիարքարանի դիրքորոշումն ու ստացել են նույն պատասխանը. «Մենք ոչ մի մեկնաբանություն չեն կարող անել, հարցի պատասխանը կարող է տալ միայն Թուրքիո կառավարությունը»:
Հարցին, թե Պոլսո Հայոց պատրիարքարանը երբեւէ դիմե՞լ է թուրքական իշխանություններին՝ Անիի Մայր տաճարում աղոթելու առաջարկով եւ ի՞նչ պատասխան է ստացել, Սրբազանն ասաց, որ չի դիմել, քանի որ դրա կարիքը չի ունեցել: «Մենք դրա պետքությունը չենք զգացել՝ Անի գնալ եւ այնտեղ պատարագ անել կամ աղոթել: Ես 2200 հատ եկեղեցի ունեմ Թուրքիայում: Եւ եթե Աղթամարի Սուրբ Խաչ եկեղեցուց բացի Անիում էլ պատարագ անցկացնելու համար դիմեմ, դա շատ սխալ քայլ կլինի»,-նկատեց Արամ Սրբազանը: Նա նաեւ հավելեց. «Ի վերջո, մենք այստեղ փոքրամասնություն ենք, իսկ իրենք մեծամասնություն: Ես այստեղ պահպանելիք շատ իրավունքներ ունեմ՝ հիվանդանոցներ ունեմ, դպրոցներ ունեմ, դեսպանատներ ունեմ...ունեմ, ունեմ, ունեմ եւ այդ հարցերում թուրքական իշխանությունների հետ պետք է աշխատեմ»:
Նշենք, որ շատ մասնագետների կողմից Կովկասի ճարտարապետության զարդը համարվող Անիի մայր տաճարի շինարարությունն սկսվել է հայոց արքա Սմբատ 2-րդի օրօք՝ 989 թվականին եւ ավարտվել Գագիկ 1-ինի օրօք՝ նրա կնոջ՝ Կատրամիդե թագուհու օժանդակությամբ 1001 թվականին։ Անիի մայր տաճարի ճարտարապետն էր Տրդատը, ով նաեւ վերակառուցել էր Կոստանդնուպոլսի Ս. Սոֆիա տաճարի գմբեթը:
Հիշեցնենք, որ Թուրքիայի մշակույթի եւ տուրիզմի նախարարությունը որոշում է կայացրել թույլ տալ «Ազգայնական շարժում» կուսակցության ղեկավար Դեւլեթ Բահչելիին եւ նրա կուսակցության 40 նահանգային կառույցների ղեկավարներին վաղը՝ հոկտեմբերի 1-ին, Անիի մայր տաճարում ուրբաթօրյա նամազ իրականացնել: