Առաջիկա երկու ամսվա ընթացքում թուրքական իշխանությունները խոստացել են տեղադրել Աղթամարի Սուրբ Խաչ եկեղեցու խաչը: Այս մասին NEWS.am-ի թղթակցի հետ զրույցում ասաց Պոլսո Հայոց պատրիարքական ընդհանուր փոխանորդ, արքեպիսկոպոս Արամ Աթեշյանը: Նա նշեց, որ խոսքը գնում է մինչեւ նոյեմբեր ժամկետի մասին: «Ինձ կուսակալը խոստացել է, որ խաչը պետք է տեղադրվի: Երբ որ պետությունը քեզ մի բան է խոստանում, քեզ մնում է միայն սպասել եւ տեսնել, թե իրենց խոսքին տեր պիտի լինե՞ն, թե՞ ոչ: Ես հիմա սպասման մեջ եմ»,-նշեց նա: Աթեշյանը հավելեց նաեւ, որ եւս մեկ շաբաթ կսպասի, իսկ այնուհետ կդիմի կուսակալությանը՝ պարզելու, թե «ինչ գետնի վրա են խաչի տեղադրման աշխատանքները»:
Հիշեցնենք, որ սեպտեմբերի 19-ին Սուրբ խաչ եկեղեցում Արամ Աթեշյանի կողմից պատարագ մատուցվեց, սակայն եկեղեցու գմբեթին խաչ այդպես էլ չտեղադրվեց: Թուրքական իշխանությունները պատճառաբանեցին, թե խաչը ծանր է եւ համապատասխան տեխնիկա է անհրաժեշտ՝ այն տեղադրելու համար:
Նշենք, որ Հայ հոգեւոր երեք կենտրոնները՝ Մայր Աթոռ Սուրբ Էջմիածինը, Մեծի Տանն Կիլիկիո կաթողիկոսությունը, ինչպես նաեւ Երուսաղեմի հայոց պատրիարքարանը չեն մասնակցել պատարագին:
