Երեւանում ընդունելություն է տեղի ունեցել Լեհաստանի ազգային տոնի` Սահմանադրության օրվա առիթով:
Լեհական «Պոլոնիա» միության «Գվյազդոչկա» երգչախումբը կատարել է Լեհաստանի եւ Հայաստանի ազգային օրհներգերը, ինչպես նաեւ լեհական ավանդական 3 երգ` «Չեռվոնե կորալե», «Չեռվոնե յագոդի» եւ «Լիպկա»:
Միջոցառմանը ներկա է եղել Հայաստանի փոխարտգործնախարար Կարեն Նազարյանը, Հայաստանում հավատարմագրված դիվանագետներ, ինչպես նաեւ այլ պաշտոնատար անձինք:
Հայաստանում Լեհաստանի արտակարգ եւ լիազոր դեսպան Եժի Մարեկ Նովակովսկու խոսքով, Լեհաստանի սահմանադրությունը Եվրոպայում առաջին սահմանադրությունն է եւ աշխարհում երկրորդը` ԱՄՆ-ի սահմանադրությունից հետո: Դիվանագետի խոսքով, դա խորհրդանշում է ժողովրդավարության եւ անկախության ուժը: «Ես բազմիցս հայտնել եմ, որ Հայաստանը պատմականորեն կապված է Լեհաստանին: Այսօր կնշեմ, որ ներկան եւս կապում է մեր երկրներին: Այդ մասին է վկայում Հայաստանի եւ Լեհաստանի միջեւ արտաքին առեւտրաշրջանառության զարգացումը եւ հայ-լեհական բիզնես ֆորումը, որը Հայաստանում ընթացել է երկու շաբաթ առաջ», - նշել է Նովակովսկին:
Լեհական մեծ ընկերություններ, շարունակել է դեսպանը, շահագրգռություն են հայտնել Հայաստանում ներդրումներ կատարելու, որովհետեւ այն դիտարկում են որպես գործընկեր երկիր` շուկա ելքի հսկայական հեռանկարներով: Եժի Մարեկ Նովակովսկին նաեւ հույս է հայտնել, որ Հայաստանի եւ ԵՄ-ի միջեւ համագործակցության խորացումը, այդ թվում` Հայաստանի եւ ԵՄ-ի միջեւ շրջանակային համաձայնագրի ստորագրումը լրացուցիչ խթան կդառնա երկու երկրի սերտ համագործակցության համար եւ կարագացնի վիզայի ռեժիմի ազատականացման գործընթացը:
Հայաստանի քաղաքացիները, ընդգծել է դեսպանը, Լեհաստանում ցանկալի հյուրեր են: «Հայաստանը եւ Լեհաստանը միմյանց հետ կապված են նաեւ քրիստոնեական հնագույն ավանդույթներով: Հայաստանին եւ Լեհաստանին կապում է բազմադարյա պատմությունը, տնտեսությունը եւ մշակույթը: Ես համոզված եմ, որ մեր համընդհանուր արժեքների հիման վրա մեզ կհաջողվի հասնել համագործակցության ամրապնդման նաեւ ԵՄ-ի Արեւելյան գործընկերության ծրագրի շրջանակում», - ընդգծել է Եժի Մարեկ Նովակովսկին: Գալիք` 2017 թվականին, հավելել է դեսպանը, նշվելու է Լեհաստանում հայ համայնքի 650-ամյակը: