Թուրքիայի նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինին գրած նամակում ռուսաստանցիներին շնորհավորել է Ռուսաստանի օրվա կապակցությամբ եւ մաղթել, որ Մոսկվայի եւ Անկարայի հարաբերությունները հայտնվեն «արժանի մակարդակի» վրա։
«Մեծարգո՛ պարոն Նախագահ։ Ամբողջ թուրք ժողովրդի անունից ի դեմս Ձեզ շնորհավորում եմ բոլոր ռուսաստանցիներին Ռուսաստանի օրվա առթիվ եւ մաղթում եմ, որ ապագայում Ռուսաստանի եւ Թուրքիայի միջեւ հարաբերությունները դուրս գան արժանի մակարդակի վրա»,– ասված է շնորհավորական նամակի մեջ, փոխանցում է «ՌԻԱ Նովոստի»–ն։
Թուրքիայի վարչապետ Բինալի Յըլդըրըմն իր հերթին ՌԴ կառավարության ղեկավար Դմիտրի Մեդվեդեւին գրած նամակում հույս է հայտնել, որ առաջիկայում երկու երկրների միջեւ համագործակցությունն ու հարաբերությունները կհասնեն նոր մակարդակի, որը բխում է երկու ժողովուրդների շահերց։
«Ի դեմս Ձեզ ռուսաստանցիներին մաղթում եմ բարեկեցություն եւ բարգավաճում»,– գրել է Յըլդըրըմը։
Ռուսաստանի եւ Թուրքիայի հարաբերությունները վատթարացել էին 2015-ի նոյեմբերին Սիրիայի երկնքում թուրքական կործանիչի կողմից ռուսական Սու–24 ռմբակոծիչը խոցելու պատճառով։ Նշենք, որ վերջին շրջանում Անկարան հաճախ է խոսում Մոսկվայի հետ հարաբերությունները վերականգնելու ցանկության մասին։