47–ամյա որդու սպանության համար 13 տարվա ազատազրկման դատապարտված 75-ամյա Կարապետ Ոսկանյանի փաստաբանի առաջին ատյանի դատարանի որոշումը բեկանելու մասին բողոքը Վերաքննիչ չի ընդունվել՝ օրենքով սահմանված ժամկետների խախտման պատճառով: Փաստաբանը հունիսի 7-ին բաց թողնված ժամկետը հարգելի համարելու եւ վերականգնելու միջնորդություն է ներկայացրել առաջին ատյանի դատարան, որը առաջին ատյանի դատարանը մերժել է: NEWS.am-ի հետ զրույցում փաստաբան Վահե Մակյանը նշեց, որ այն բողոքարկել է Վերաքննիչ դատարան, որը վարույթ է ընդունվել:
Հիշեցնենք, որ Կարապետ Ոսկանյանը մեղավոր է ճանաչվել եւ դատապարտել է 13 տարվա ազատազրկման:
Կարապետ Ոսկանյանին մեղադրանք է առաջադրվել այն բանի համար, որ նա 2015թ. հունվարի 25-ին` ժամը 17:00-ի սահմանում, իրեն պատկանող ավտոտնակում տանիքը վերանորոգելու հարցի շուրջ վիճաբանել է որդու` Գերման Ոսկանյանի հետ, որի ընթացքում նրան ապօրինաբար կյանքից զրկելու դիտավորությամբ, ավտոտնակից վերցնելով կացինը` դրա սուր եւ բութ հատվածներով բազմակի հարվածներ է հասցրել Գերման Ոսկանյանի գլխին եւ գանգուղեղային բազմակի բաց բութ եւ կոտրած վնասվածքներ պատճառելով` սպանել է նրան:
Կարապետ Ոսկանյանին մեղադրանք է առաջադրվել ՔՕ-ի 104 հոդվածի 1 մասով` սպանությունը՝ ապօրինաբար մեկ ուրիշին դիտավորությամբ կյանքից զրկելը, որը պատժվում է ազատազրկմամբ՝ վեցից տասներկու տարի ժամկետով:
