Շորթման մեջ մեղադրվող Analitik.am լրատվական կայքի գլխավոր տնօրեն Անի Հովհաննիսյանի կալանքը դատարանը երկարացրել է առանց հիմնավոր պատճառաբանության: NEWS.am-ի հետ զրույցում նրա փաստաբան Լիպարիտ Սիմոնյանը նշեց, որ դատարանի որոշման մեջ պատճառաբանական մասը բացակայում է, միայն եղել են ստանդարտ, մեխանիկական ձեւակերպումներ.«Այդ ստանդարտ ձեւակերպումները հանդիպում են գրեթե բոլոր կալանքների դեպքերում: Ես քննիչին հարց եմ տալիս՝ ինչո՞վ կապացուցեք, որ Անի Հովհաննիսյանը ազատության մեջ մնալով կխոչընդոտի քննությանը, պատասխանում է, քանի որ մեղադրանքը ծանր է, հետեւաբար ինքը կխուսափի, կխոչընդոտի: Ասում եմ՝ կա՞ նման ապացույց, որի վրա հիմնվելով ասում եք, պատասխանում է՝ ենթադրում ենք, որ կխուսափի: Հարցնում եմ՝ ներկայացված փաստաթղթերի մեջ կա՞ մի բան, որ ձեզ այդ հետեւությանն է բերում, նորից ասում է՝ ազատության մեջ կխուսափի, կթաքնվի կամ քննությունից կթաքցնի իր համակարգչում գտնվող նյութերը, բայց առգրավել են այդ համակարգիչը, իրենց մոտ է, ոնց է թաքցնելու, անհասկանալի է»,-ասաց փաստաբանը:
Լիպարիտ Սիմոնյանը նաեւ նշեց, որ իր պաշտպանյալը երբեւիցե դժգոհ չի եղել իր խցից եւ խցակիցներից եւ մի քանի շաբաթ առաջ, նրա խուցը փոխվել է ՔԿՀ-ի վարչակազմի որոշմամբ:
Ավելի վաղ տեղեկացրել էինք, որ Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը հունիսի 30-ին, 2 ամսով երկարաձգել է շորթման մեջ մեղադրվող, Analitik.am լրատվական կայքի գլխավոր տնօրեն Անի Հովհաննիսյանի կալանքի ժամկետը:
Հիշեցնենք, որ Անի Հովհաննիսյանը մեղադրվում է պատգամավոր Տիգրան Ուրիխանյանից շորթում կատարելու մեջ: Ըստ ոստիկանության՝ Ուրիխանյանը հաղորդում է տվել, որ «analitik.am» լրատվական կայքի տնօրենը կայքում պարբերաբար իր անձի, ընտանիքի անդամների, ինչպես նաեւ իր` որպես ԱԺ պատգամավորի գործունեությանը վերաբերող սուտ տեղեկատվություններ, զրպարտություններ եւ վարկաբեկիչ այլ նյութեր հրապարակելու կապակցությամբ հանդիպումներ է ունեցել իր հետ, որոնց ընթացքում, անդրադառնալով կայքի նախկին հրապարակումներին, դրանք չդադարեցնելու եւ հետագայում նմանատիպ հոդվածներ հրապարակելու սպառնալիքով իրենից պահանջել է յուրաքանչյուր ամիս վճարել 300 հազար դրամ:
Այնուհետեւ, կայքի տնօրենի ներկայացրած պահանջի կապակցությամբ պատգամավորի անունից բանակցություններ է վարել նրա ներկայացուցիչը: Բանակցությունների ընթացքում նրանց միջեւ պայմանավորվածություն է ձեռք բերվել, որ պահանջվող 300.000-ական դրամը, նախապես պայմանավորված որեւէ վայրում, մինչեւ յուրաքանչյուր ամսվա 5-ը պետք է վճարվի կամ կայքի տնօրենին, կամ նրա օգնականին:
Նախաքննությունը շարունակվում է:
