![](img/news/33/52/51/default.jpg)
ՀՀ նախագահ, Ազգային անվտանգության խորհրդի Նախագահ Սերժ Սարգսյանն այսօր՝ հուլիսի 2-ին, անցկացրել է Ազգային անվտանգության խորհրդի նիստ:
Նախագահի մամուլի գրասենյակից NEWS.am-ին հայտնում են, որ օրակարգը ներառել է «Կենսաբանական անվտանգության ապահովման ռազմավարության» նախագծի մասին հարցը եւ այլ հարցեր:
Խորհրդի անդամները քննարկել եւ հավանության են արժանացրել «Կենսաբանական անվտանգության ապահովման ռազմավարության» նախագիծը, որը զեկուցել է ՀՀ առողջապահության նախարար Արմեն Մուրադյանը:
Հիմնավորելով վերոնշյալ ռազմավարության ընդունման անհրաժեշտությունը՝ նախարարն ընդգծել է, որ այն բխում է կենսաբանական անվտանգության ապահովման ոլորտում իրականացվող գործունեության պատշաճ համակարգման, անհրաժեշտ իրավական կարգավորումների կիրարկման, քաղաքական առաջնահերթությունների եւ անվտանգության ապահովման սկզբունքների հստակ ձեւակերպման, ինչպես նաեւ միջազգայնորեն սահմանված անվտանգության պահանջներին համահունչ երկարաժամկետ պետական քաղաքականության իրականացման ու կենսաբանական սպառնալիքների հակազդմանն ուղղված միջոցառումների արդյունավետության բարձրացման հրամայականից: Ռազմավարության հիմնական նպատակն է՝ կատարելագործել եւ ամրապնդել կենսաբանական անվտանգության ապահովման համակարգը՝ ներքին եւ արտաքին վտանգներին, սպառնալիքներին դիմակայելու, ինչպես նաեւ մարդու, բնակչության, շրջակա միջավայրի էկոհամակարգի վրա կենսաբանական սպառնալիքների ազդեցության ռիսկերը նվազեցնելու համար: