Վրաստանի իշխանությունները Նինոծմինդայում մանկատուն են կառուցում 70-80 որբերի համար, բայց իրականում այդ շենքը համալիր շինություն է: Այդ մասին լրագրողների հետ զրույցում հոկտեմբերի 7-ին հայտնել է Հայաստանի Ազգային Ժողովի պատգամավոր, «Ջավախք» հայրենակցական միության ղեկավար Շիրակ Թորոսյանը:
Շինության հարեւանությամբ գտնվող երկու տները իշխանությունները հարկադիր կարգով գնել են` կրկնակի գումար վճարելով: Նրանք պատրաստվում են գնել եւս երկու հարեւան տներ:
Թորոսյանի խոսքով, գիշերները շինհրապարակ են գալիս բեռնատարներ, ժամանում են կասկածելի դեմքեր: «Բայց գլխավորն այն է, որ ոչ ոք չգիտի, թե ինչ են կառուցում իրականում, եւ արդյոք այդ համալիրը ծառայելո՞ւ է երեխաներին: Թեկուզ շինարարներից ինչ-որ բան պարզելու բոլոր փորձերը ձախողվել են, իսկ վատագույն դեպքում հետաքրքրվողներով սկսել է հետաքրքրվել Վրաստանի ազգային անվտանգության ծառայությունը»,- ասել է նա:
Թորոսյանին հետաքրքրում է, թե ինչո՞ւ է մանկատունը կառուցվում հատկապես Ջավախքում, որտեղ, ինչպես հայտնի է, հայերը որբ երեխաներին փողոցում չեն թողնում: Կասկածելի է, որ մանկատունը կառուցում են խիստ եղանակային պայմաններով վայրում: Ըստ Թորոսյանի, դա հերթական անգամ ապացուցում է, որ Վրաստանի իշխանությունները Ջավախքում ձուլման քաղաքականություն են վարում, ցանկանում են Ջավախքում ազգային անվտանգության բաժիններ ստեղծել: