![](img/news/03/43/79/default.jpg)
Ջավախահայության իրավունքների պաշտպանության խորհուրդը հայտարարություն է տարածել, որտեղ նշում է, որ ԱՄՆ-ում գործող հայկական լոբբիստական կազմակերպությունները պարտավոր են ավելի մեծ ուշադրություն դարձնել ջավախքահայության իրավունքների ոտնահարման խնդրին: Հայտարարության մեջ մասնավորապես ասվում է.
«Վրաստանի հայ բնակչությունը, եւ հատկապես երկրի հարավ-արեւմտյան շրջաններում (Սամցխե-Ջավախք-Ծալկա) համախումբ բնակվող նրա հատվածը՝ ջավախքահայությունը, տառապում է իր քաղաքական, քաղաքացիական, լեզվական, կրթա-մշակութային եւ կրոնական իրավունքների ոտնահարումից:
Վրացական իշխանությունները, արհամարհելով ջավախքյան, հայաստանյան եւ միջազգային կազմակերպությունների հայտարարությունները, կոչերն ու հանձնարարականները, հետեւողականորեն խստացնում են ջավախքահայության նկատմամբ իրենց խտրական քաղաքականությունը.
- Գնալով ուժեղանում է Վրաստանի ուժային կառույցների կողմից ջավախքահայության հասարակական-քաղաքական կյանքի նկատմամբ վերահսկողությունը, քայլեր են ձեռնարկվում ջավախքահայության պահանջատիրության բոլոր դրսեւորումներն արմատախիլ անելու ուղղությամբ.
- Շարունակվում է անազատության մեջ պահվել շինծու մեղադրանքներով 10 տարվա ազատազրկման դատապարտված ջավախքահայ քաղաքական գործիչ Վահագն Չախալյանը.
- Փակվում են հայկական դպրոցները. Ջավախքում դեռեւս գործող հայկական դպրոցներում կրճատվում են հայերենով դասավանդվող առարկաները, հայոց լեզվի դասաժամերը.
- Գնալով խստացվում է Ջավախքի հանրային կյանքի բոլոր ոլորտներում բացառապես վրացերենի օգտագործումը պարտադրող օրենքների կիրառումը.
- Մերժվում է Հայ Առաքելական Եկեղեցու` որպես կրոնական կազմակերպություն, պետական գրանցումը, չեն վերադարձվում խորհրդային իշխանության տարիներին նրանից բռնագրավված հայկական տաճարները:
Ջավախքահայության իրավունքների պաշտպանության համակարգող խորուրդը ցանկանում է հրավիրել նշված փաստերի նկատամամբ ԱՄՆ-ում գործող հայկական լոբբիստական կազմակերպությունների` Ամերիկայի Հայկական Համագումարի եւ Ամերիկայի Հայ Դատի հանձնախմբի ուշադրությունը: Որպես ԱՄՆ-ում հայության շահերը պաշտպանող կառույցներ` դուք պարտավոր եք ավելի մեծ ուշադրություն դարձնել վրացական իշխանությունների կողմից ջավախքահայության իրավունքների ոտնահարման խնդրի վրա` ներկայացնելով այս աղաղակող փաստերը ԱՄՆ իշխանական համապատասխան կառույցներին, հանդես գալով երեւույթը դատապարտող հայտարարություններով եւ ձեռնարկելով այլ պատշաճ քայլեր:
Սահակաշվիլիի վարչակարգը փորձում է դիմակայել ազգային փոքրամասնությունների նկատմամբ իր քաղաքականությունը քննադատող ջավախքյան, հայաստանյան ու եվրոպական կազմակերպությունների ճնշումներին` շահագործելով տարածաշրջանում ԱՄՆ գործընկեր-պետության իր դիրքը եւ հենվելով ԱՄՆ կառավարության լուռ մեղսակցության վրա: Այս հանգամանքը վճռորոշ է դարձնում ԱՄՆ հայկական լոբբիստական կազմակերպությունների դերը ջավախքահայության խնդիրների լուծման գործում:
Ջավախքահայության իրավունքների պաշտպանության համակարգող խորուրդը կոչ է անում Ամերիկայի Հայ Դատի հանձնախմբին եւ Ամերիկայի Հայկական Համագումարին ներառել ջավախահայության իրավունքների պաշտպանության խնդիրը իրենց օրակարգում` քաջալերելով Վրաստանում ժողովրդավական արժեքների արմատավորմանն ու ազգային փոքրամասնությունների իրավունքների պաշտպանությանն ուղղված ԱՄՆ իշխանությունների ջանքերը»: