Մասաչուսեթսի տեխնոլոգիական ինստիտուտի եւ Ford Motor Company-ի ամերիկացի գիտնականները կարողացել են բջջային հեռախոսների տերերի գտնվելու վայրի եւ տեղաշարժերի վերաբերյալ տեղեկությունների օգնությամբ կազմել քաղաքով մարդկանց տեղաշարժի քարտեզը: Հետազոտությունը հրապարակվել է Proceedings of the National Academy of Sciences ամսագրում: Աշխատանքի մասին համառոտ տեղեկացնում է RNS-ը:
Մշակված ալգորիթմը փորձարկելու համար գիտնականները ծրագրում տվյալներ են ներբեռնել վեց շաբաթվա ընթացքում Բոստոնի բնակիչների տեղաշարժերի մասին: Սմարթֆոնների տերերի գտնվելու վայրն արձանագրվել է, երբ նրանք զանգել են հեռախոսով կամ ինտերնետ են օգտագործել: Արդյունքում հետազոտողները ստացել են շարժման սխեման, որի կազմումը սովորաբար ծախսատար է եւ մի քանի տարի է պահանջում:
Գիտնականներն այն համեմատել են Բոստոնի վարչակազմի մշակած պլանի հետ եւ տեսել, որ մոդելները գրեթե համընկել են: «Մեր աշխատանքի մեծ առավելությունն այն է, որ այն հիմնված է հսկայական թվով մարդկանցից ստացված տվյալների վրա, բայց մենք կարիք չունենք ուղղակիորեն հարցնել տեղաշարժերի մասին», – պատմել է Մասաչուսեթսի համալսարանի պրոֆեսոր, հետազոտության ավագ հեղինակ Մարտա Գոնսալեսը: