Այսօր՝ օգոստոսի 30-ին, վիրահատության ենթարկված «Սասնա ծռերից» Արամ Մանուկյանի վիճակը բավարար է: «Կատարվել է հատուկ մետաղային հարթակով ոսկրային բեկորների ֆիքսում եւ կոտրվածքի ֆիքսում, սա վերջնական վիրահատություն է»,- քիչ առաջ լրագրողների հետ զրույցում նշել է «Էրեբունի» ԲԿ-ի տնօրեն Միքայել Մանուկյանը՝ անդրադառնալով Արամ Մանուկյանի ավարտված վիրահատությանը:
Նրա խոսքով, մի քանի օր դեռ նա կմնա վերակենդանացման բաժանմունքում, որպեսզի կանխվեն հնարավոր բարդացումները, որից հետո կհայտնեն, թե ինչ հետագա բուժում անհրաժեշտ կլինի:
«Ըստ մեր փորձի, նման վիրահատություններից հետո հաշմանդամություն չի նկատվում: Արամ Մանուկյանի մոտ դա չենք սպասում: Վիրահատությունն անցել է այնպես, ինչպես պլանավորել էինք, բոլոր բեկորները վերականգնվել են, մետաղական հարթակը ճիշտ տեղադրվել է եւ դա նվազեցնում է ցանկացած հետագա բարդացում ու խնդիր»,-ասաց նա:
Հարցին, հնարավոր համարում է, որ հիվանդի խնամքով զբաղվի մայրը, Մանուկյանը պատասխանեց. «Այդ հարցին չեմ կարող պատասխանել, որովհետեւ նա հատուկ հսկողության տակ է գտնվում եւ այդ հարցը պետք է ուղղել իրավապահներին»: