ԼՂՀ Քարվաճառ շրջկենտրոնում 16 օր ջուր չլինելուց հետո, օգոստոսի 30-ի երեկոյան ջրամատակարարումը վերականգնվել է: NEWS.am-ի հետ զրույցում Քարվաճառի բնակիչ, քաղաքագետ Ալեքսանդր Քանանյանը նշեց՝ չնայած ջրագծի վերականգմանը, օգոստոսի 31-ին քաղաքում մի քանի ժամ նորից ջուր չի եղել:
«Ջրագիծը շատ անկայուն է եւ երեկ մի քանի ժամ էլի անջատված էր ջուրը, այսօր էլի տվեցին: Խնդիրն այն է, որ ջրագիծը 60-ական թվականների է եւ այնքան կարկատված է, այնքան է վնասվել, որ դրա գործածության ժամանակը սպառվել է ու վստահաբար մինչեւ ձմեռ նոր ջրագիծ կառուցելու անհրաժեշտություն կա: Սակայն, շատ լուրջ տարակուսանք ունեմ, որ կառավարությունը անհրաժեշտ գումար կհատկացնի այն վերանորոգելու համար: Ձմեռը, եթե վթար եղավ եւ ջրագիծը վնասվեց, արդեն կարող է ամիսներով ջուր չլինել: 1999 թ. ի վեր մեկ անգամ չէ, որ այդ ջրագիծն իբր վերանորոգելու համար ահռելի գումարներ են պետբյուջեից տրամադրվել, որոնց ճակատագիրը հայտնի է»,-ասաց նա:
Մինչդեռ NEWS.am-ին ԼՂՀ Քաղաքաշինության նախարարությունից վստահեցրին, որ Քարվաճառի ջրատար համակարգը վերանորոգվել է եւ առաջիկայում նման վթարային իրավիճակների ստեղծումը բացառվում է:
«Խողովակաշարերի մասնակի տեղադրում է եղել, խցանումների բացում, նոր տեղադրված ջրագծերն ավելի խորն են թաղվել եւ ջուրն արդեն հասանելի է Քարվաճառում: Ջրատար համակարգը վերանորոգվել է, ջրագծերը վերանորոգվել են եւ վտանգ չկա կրկին վթարային իրավիճակ ստեղծվելու»,-ասաց ԼՂՀ Քաղաքաշինության նախարարի մամուլի խոսնակ Հունան Թադեւոսյանը: