Հայաստանի 6 մարզերում այսօր՝ հոկտեմբերի 2-ին, տեղական ինքնակառավարման մարմինների հերթական ընտրություններն են: Այսօր տեղական ինքնակառավարման մարմինների ընտրություններ տեղի կունենան Գեղարքունիքի, Կոտայքի, Լոռու, Շիրակի, Վայոց ձորի եւ Սյունիքի 375 համայնքներում, իսկ Գյումրիում եւ Վանաձորում՝ ավագանու:
Բացի այդ, Գյումրիում եւ Վանաձորում առաջին անգամ քաղաքացիները ընտրություն կկատարեն ոչ թե անձերի, այլ քաղաքական ուժերի միջեւ եւ հաղթող քաղաքական ուժն էլ առաջիկա 5 տարիների ընթացքում կղեկավարեն այդ քաղաքները:
Առավել թեժ ընտրություններ են սպասվում Գյումրիում, Վանաձորում, Արթիկում եւ Սեւանում: Քաղաքապետի ընտրություններ տեղի կունենա 26 քաղաքային համայնքում, միայն համայնքի ղեկավար կընտրեն՝ 2 -ում, ավագանու անդամ՝ 8 եւ համայնքի ղեկավար եւ ավագանի 16 -ում:
Գյումրիում տեղական ինքնակառավարման մարմինների ընտրություններին մասնակցելու համար գրանցվել է 10 կուսակցություն եւ մեկ դաշինք՝ «Ալյանս առաջադիմական ցենտրիստական» կուսակցությունը, «Բարգավաճ Հայաստան» կուսակցությունը, «Գաղափարակից լիբերալների ալյանս» (ԳԱԼԱ) կուսակցությունը, «Գյումրեցու ոգի» կուսակցությունը, «Գործարար» կուսակցությունը, «Համախմբում» կուսակցությունը, «Հայ ազգային կոնգրես» կուսակցությունը, «Հայ հեղափոխական դաշնակցություն» կուսակցությունը, «Հայկական վերածնունդ» կուսակցությունը, «Քաղաքացիական պայմանագիր» կուսակցությունը եւ «Բալասանյան» դաշինքը, որին սատարում է իշխող «Հանրապետական» կուսակցությունը:
Վանաձորում համայնքի ավագանու ընտրություններին մասնակցելու համար գրանցվել է 8 կուսակցություն՝ «Բարգավաճ Հայաստան», «Լուսավոր Հայաստան, «Համախմբում», «Հայ ազգային կոնգրես», «Հայ հեղափոխական դաշնակցություն», «Հայաստանի Հանրապետական», «Հայկական վերածնունդ», «Քաղաքացիական պայմանագիր» կուսակցությունները:
Արթիկում առաջադրվել է քաղաքապետի երկու թեկնածու՝ նախկին ԲՀԿ-ական Մուշեղ Պետոյանն ու Մխիթար Վարագյանը, վերջինիս ընտանիքը Ռուսաստանի Դաշնությունում խոշոր բիզնեսներ ունի:
Սեւան քաղաքում պայքարում են անկուսակցական Սարգիս Մուրադյանը, որին սատարում է «Հանրապետական» կուսակցությունը եւ ՀՀԿ-ական Ռուդիկ Ղուկասյանը, որին սակայն, «Հանրապետական» կուսակցությունը չի սատարում: