Մարդիկ, որոնք օրվա հացի կարոտ էին, երկրորդ դասարանի կրթություն ունեին, միանգամից հարստացան։ Այս մասին այսօր՝ հոկտեմբերի 24-ին, Ազգային ժողովում լրագրողների հետ զրույցում հայտարարել է ՀՀԿ խմբակցության պատգամավոր Համլետ Հարությունյանը՝ մեկնաբանելով, որ ներկա տնտեսական դաշտի վիճակը սոցիալիզմից վայրի կապիտալիզմի անցնելու հետեւանքն է։
«Պետք է մենաշնորհներին վերջ տրվի եւ թույլ տրվի՝ նրանք, ովքեր ինչ-որ բան են ուզում ներկրել ու արտահանել, ազատ կերպով իրականացնեն։ Մենք կամաց-կամաց փոխվելով հասել ենք էս հանգրվանին։ Սրանից հետո էլ էդ փոփոխությունները կլինեն, որովհետեւ Մոսկվան մի օրում չի կառուցվել։ Ես ինքս՝ որպես անհատ, ՀՀԿ անդամ, կատեգորիկ դեմ եմ բոլոր անարդարություններին, ինքս թույլ չեմ տվել որեւէ օրինազանցություն, հետեւաբար ես ձեր նման դատապարտում եմ եւ օլիգարխներին, եւ մենաշնորհները։ Առաջին հերթին դա վնասում է ինձ եւ իմ նմաններին»,-ասել է պատգամավորը։
Պատգամավորը նշել է, որ այդ արատները բնորոշ են բոլոր երկրներին եւ Հայաստանում դա տեղի ունեցավ, քանի որ սոցիալիզմից միանգամից անցում կատարվեց վայրի կապիտալիզմի։
«Վայրի կապիտալիզմի ժամանակ առանց հովանավորելու այդ արատավոր երեւույթները զարգանում են։ Կապիտալի նախնական կուտակումը հիմնականում հանցավոր ճանապարհով է լինելու։ Մենք երբ սոցիալիզմից անցանք կապիտալիզմին, տեղի ունեցավ վայրի սեփականաշնորհում եւ մարդիկ, որոնք օրվա հացի կարոտ էին երկրորդ դասարանի կրություն ունեին, միանգամից հարստացան։ Այս կապիտալի նախնական տեսակը իր հետ առաջ է բերում հանցավոր գործունեություն, նրանց տերերից շատերն էլ չգիտեն, որ դա հանցավոր ճանապարհ է, բայց գնալով զուլալվում է եւ դառնում է կլասիկ կապիտալիզմ։ էլի կլինի օլիգարխիա, հովանավորչություն, մենաշնորհ, բայց դրա չափերի մասին պետք է խոսենք»,-նշել է պատգամավորը։
