Վահան Շիրխանյանի մոտ առողջական վիճակի վատթարացում չի նկատվել, եւ վերջինս իր բուժումը կարող է ստանալ քրեակատարողական հիմնարկի պայմաններում, բժիշկների դինամիկ հսկողության ներքո: Այս մասին հաղորդագրություն է տարածել ՀՀ ԱՆ Քրեակատարողական վարչության հանրային կապերի բաժինը:
Հաղորդագրությունում ասվում է. «Երեկ Զանգվածային լրատվության միջոցների ներկայացուցիչներին տված հարցազրույցի ընթացքում ՀՀ ԱՆ «Երեւան-Կենտրոն» քրեակատարողական հիմնարկում պահվող կալանավորված անձ Վահան Շիրխանյանի փաստաբան Հայկ Ալումյանը կրկին խոսել է իր պաշտպանյալի առողջական վիճակի մասին: Այս կապակցությամբ Քրեակատարողական ծառայությունը հարկ է համարում տեղեկացնել, որ 23.09.2016թ. ՀՀ առողջապահության նախարարություն ուղղված գրության հիմքով հրավիրվել է բազմապրոֆիլ բժշկական կոնսիլիում, որը խորհուրդ է տվել հիվանդի ախտորոշումը եւ բուժման տակտիկան որոշելու համար շարունակել հետազոտությունները:
Ըստ այդմ` 2016 թ. հոկտեմբերի 6-ին Վ. Շիրխանյանը «Աղաբեկյան» ախտորոշիչ կենտրոնում ենթարկվել է ստորին վերջույթների դուպլեքս հետազոտության:
Նույն օրը, պաշտպանի դիմումի համաձայն, տեղափոխվել է իր իսկ նախընտրած «Վլադիմիր Ավագյանի անվան բժշկական կենտրոն»` արյան մեջ Դ դիմերի մակարդակի եւ թոքերի ռենտգեն հետազոտություններ կատարելու նպատակով:
07.10.2016 թ. Վ. Շիրխանյանին նույն կենտրոնում բժիշկ-անոթաբան Ս. Սուլթանյանի կողմից տրվել է խորհրդատվություն. նշանակվել է համապատասխան բուժում:
17.10.2016 թ. կրկին վերոնշյալ բուժհաստատությունում վերջինս ենթարկվել է թոքերի ռենտգեն եւ որովայնի խոռոչի ուլտրաձայնային հետազոտությունների:
Անցկացված հետազոտությունները փաստել են, որ ՀՀ ԱՆ «Երեւան-Կենտրոն» ՔԿՀ-ում պահվող կալանավորված անձ Վահան Շիրխանյանի մոտ առողջական վիճակի վատթարացում չի նկատվել, եւ վերջինս իր բուժումը կարող է ստանալ քրեակատարողական հիմնարկի պայմաններում, բժիշկների դինամիկ հսկողության ներքո»:
