Նախկին վարչապետ, ՀՀԿ Գործադիր մարմնի անդամ Հովիկ Աբրահամյանը չի մասնակցել այսօր տեղի ունեցած նիստին։ Այս մասին այսօր՝ նոյեմբերի 17-ին, ՀՀԿ Գմ նիստից հետո լրագրողների հետ զրույցում հայտարարել է ՀՀԿ խոսնակ, ԱԺ փոխխոսնակ Էդուարդ Շարմազանովը։
Նա նշել է, որ այս նիստի ընթացքում քննարկել են կանոնադրական եւ ծրագրային հարցեր, առաջարկություններներ ներկայացրել, որոնց վերաբերյալ որոշումը կայացվի մինչեւ նոյեմբերի 26-ին սպասվող համագումարը։
Նա նշել է, որ պաշտպանության նախարար Վիգեն Սարգսյանը «Հանրապետական կուսակցություն» անդամագրվելու դիմում դեռ չի գրել։ Նշենք, որ օրեր առաջ լրագրողների հետհանդիպման ժամանակ Սարգսյանն հայտարարել էր, որ առաջիկայում կուսակցություն մտնելու դիմում կգրի։
«Գործնականում Հայաստանի Հանրապետությունում անկուսակցական քաղաքական գործիչները ապագա․․․ չասեմ՝ ապագա չունեն, բայց ամեն ինչ գնալու է նրան, որ եթե զբաղվում ես քաղաքականությամբ, պետք է լինես կուսակցության ներկայացուցիչ»,-ասել է Շարմազանովը։
Նա շեշտել է, որ ՀՀԿ-ն մեկ լիդերի կուսակցություն է։
Նշենք, որ վարչապետ Կարեն Կարապետյանը Մոսկվայում գտնվելու պատճառով չի մասնակցել այսօրվա նիստին։
