Թուրքիայում ազգայնականները  Թունջելիի (Դերսիմ) Նազըմիյեի շրջանի Խարիկ գյուղում 2015–ի ապրիլին Արմենակ Բաքըրջյանի հիշատակին նվիրված հուշաքարի հետ կապված աղավաղված տեղեկություններ են ներկայացրել, որը մեծ արձագանք է գտել։

Թուրքական ազգայնական ուղղվածության Sozcu պարբերականը օրեր առաջ հրապարակում էր տպագրել, թե Դերսիմում ԱՍԱԼԱ–ի առաջնորդների հիշատակին հուշարձան է տեղադրվել։ Այս հրապարակումը մեծ արձագանք է գտել, որից հետո ազգայնական շրջանակները արշավ են սկսել եւ նահանգապետից պահանջել հեռացնել հուշարձանը։ Նահանգապետն էլ իր հերթին հայտարարել է, թե հուշարձանը քանդելու որոշում է կայացվել։

Պետք է շեշտել, որ հիշյալ հուշաքարը նվիրված է քրդական TIKKO ձախակողմյան կազմակերպության առաջնորդներից Արմենակ Բաքըրջյանի հիշատակին։ Հուշաքարի վրա գրված է նաեւ Հրանտ Դինքի, Գեւորգ Չաուշի, Մոնթե Մելքոնյանի, Անդրանիկ Օզանյանի անունները։

Նշենք, որ Արմենակ Բաքըրջյանը ծնվել է Դիարբեքիրում։ Նա աջակցել է Արեւմտյան Հայաստանի տարածքում մնացած հայերին Ստամբուլ տեղափոխելու գործին։ Գործունեության ընթացքում ծանոթացել է Հրանտ Դինքի հետ։ Միացել է  քրդականTIKKO կառույցին եւ դարձել կառույցի հրամանատարներից մեկը։ Սպանվել է Խարբերդում թուրք զինվորականների կողմից իրականացված գործողության ժամանակ։