«Սասնա ծռեր» խմբի անդամ Արմեն Լամբարյանը վիրահատությունից հետո կարողանում է քայլակի օգնությամբ քայլել: Այս մասին NEWS.am-ի հետ զրույցում ասաց նրա մայրը՝ տիկին Փիրուզան: Նա նշեց, որ որդու կալանավորումից 5 ամիս անց դեռ չի կարողացել տեսակցել նրան:
«Ասում են՝ լավ է, մինչեւ ես չտեսնեմ, որտեղի՞ց իմանամ՝ ոնց է: Ինձ ասում են, որ լավ է, ուրի՞շ ինչ են ասելու»:
Տիկին Փիրուզան նշեց, որ Արմեն Լամբարյանի կալանավորումից հետո 5 հոգանոց ընտանիքը ծանր սոցիալական վիճակում է հայտնվել. «Ջեռուցման խնդիր կա, կարելի է ասել՝ սրա, նրա օգնելով, մի կերպ կարողանում ենք գոյատեւել»:
Տիկին Փիրուզան նշեց, որ արդեն երկու շաբաթից ավելի է՝ վատառողջ է, սակայն, տան պայմաններում է բուժում ստանում՝ հիվանդանոցում բուժվելու համար գումար չունենալու համար:
Արմեն Լամբարյանին մեղադրանք է առաջադրվել ՀՀ Քր.օր.-ի 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել) եւ 219-րդ հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը):