Պաշտոնական այցով Հայաստանում է Իրանի նախագահ Հասան Ռոհանին: Պաշտոնակցին օդանավակայանում դիմավորել է Սերժ Սարգսյանը: Երկու երկրների ղեկավարներն առանձնազրույցի ընթացքում բազմաթիվ հարցերի են անդրադարձել, իսկ հետո լրագրողներին ներկայացրել հանդիպման արդյունքները: Քննարկումների առանցքում ինչպես երկկողմ հարաբերություններին, այնպես էլ միջազգային խնդիրներին վերաբերող հարցեր են եղել:
Սերժ Սարգսյանը տեղեկացրել է, որ իրանցի պաշտոնակցին է ներկայացրել ղարաբաղյան բանակցությունների ընթացքը, Ադրբեջանի սանձազերծած ապրիլյան ագրեսիայի հետեւանքների վերացմանն ու վերջերս ձեռք բերված համաձայնագրերի իրականացմանն ուղղված ջանքերը: Երկու երկրների ղեկավարներն էլ հաստատել են, որ հակամարտությունը չի կարող ռազմական լուծում ունենալ եւ անթույլատրելի է տարածաշրջանում իրավիճակի ապակայունացմանն ուղղված ցանկացած քայլ: Նախագահները քննարկել են նաեւ քաղաքական խորհրդակցություններին, էներգետիկային, տրանսպորտին, գյուղատնտեսությանը, մշակույթին եւ այլ հարցերի լայն շրջանակ: Կարեւորվել է հատկապես տնտեսական կապերի խորացումը, ինչպես նաեւ Հայաստանի դերը՝ իրանական ապրանքների տարանցումը դեպի եվրոպական շուկա ապահովելու համար: Երկրների ղեկավարները նաեւ ընդգծել են. քիչ ժողովուրդներ կան, որոնց պատմությունն անցնում է հազարամյակների միջով, եւ հիմա էլ շարունակում են կողք կողքի քայլել ու հարգել միմյանց մշակույթը։
Նշենք, որ Հասան Ռոհանին Հայաստանի նախագահին հաջորդ տարի Իրան այցելելու հրավեր է ուղղել, Սերժ Սարգսյանն ընդունել է: Հայ-իրանական բարձր մակարդակի բանակցությունների ավարտին նաեւ մի շարք ոլորտներում երկկողմ համագործակցության խորացմանն ուղղված փաստաթղթեր են ստորագրվել: Հավելենք, որ Սերժ Սարգսյանն ու Հասան Ռոհանին ներկա են գտնվել են Երեւանում կայացած Հայաստան-Իրան գործարար համաժողովի բացմանը:
Կառավարությունն այսօր արտահերթ նիստ է հրավիրել՝ հակիրճ օրակարգով: Գործադիրը նախ հավանություն է տվել «Պետական տուրքի մասին» օրենքում փոփոխություն կատարելու մասին» օրինագծին: Նպատակն օրենքով ամրագրված դրույթները Հարկային օրենսգրքին համապատասխանեցնելն է: Որոշվել է նաեւ Ազգային ժողովի նախագահին առաջարկել վաղը արտահերթ նստաշրջան գումարել:
Փոխարենն այսօր հագեցած է եղել վարչապետի օրակարգը: Կառավարության արտահերթից հետո Կարեն Կարապետյանը հանդիպել է օտարերկրյա խոշոր ներդրողների հետ, հետո մարզեր մեկնել: Նախ՝ հանդիպման մասին: Քննարկված հարցերը մի շարք ոլորտների են վերաբերել՝ տեղեկատվական տեխնոլոգիաներ, հանքարդյունաբերություն, էներգետիկա, կրթություն եւ այլն: Այդ ոլորտներում ներդրումային ծրագրեր իրականացնող ընկերությունները գործունեության հետ կապված խնդիրների մասին են բարձրաձայնել, իսկ Կարեն Կարապետյանը հորդորել է խնդիրներն ու առաջարկությունները գրավոր ներկայացնել, որպեսզի հնարավոր լինի քայլ առ քայլ դրանք լուծել եւ առաջ շարժվել:
Վայոց ձորում եւ Արարատում հանդիպումների ժամանակ վարչապետը փորձել է համայնքների ղեկավարներին մոտիվացնել, որպեսզի կառավարությունից աջակցություն ստանան: Հայտարարել է. ծրագրեր կազմեք, համայնքի բյուջեն ավելացրեք, ես էլ սուբսիդավորումը կավելացնեմ: Վարչապետը վստահ է, որ միայն խելոք գյուղատնտեսություն ունենալու դեպքում կարող ենք հաջողության հասնել: Համայնքապետերին էլ առաջարկել է գյուղացիների շրջանում կոոպերատիվներ քարոզել ու կրկին աջակցություն խոստացել:
Նպատակային եւ ծրագրային հստակության մասին Կարապետյանը խոսել է նաեւ Արարատում: Պետական բյուջեն, նրա խոսքով, անսահմանափակ չէ, միջոցներն ուղղելու են այն ծրագրերին, որոնք նվազագույն ծախսով հնարավորինս մեծ արդյունք կապահովեն: Վստահեցրել է, որ կարող է նաեւ դրսից ներդրումներ բերել, բայց համայնքները պետք է արդեն պատրաստ ծրագրեր ունենան, որպեսզի կարողանան առաջարկել փողը գրպանում եկած ներդրողին:
Արցախի մարտական դիրքերում վիճաբանության ժամանակ, նախնական տվյալներով, ծառայակցի կողմից հրազենային վիրավորում ստացած Ազնավուր Բալեյանի վիճակը վերջապես կայունացել է: Երիտասարդը դեռեւս Վերակենդանացման բաժանմունքում է, նա գլխի շրջանում հրազենային վնասվածք ունի: Ազնավուրը Գեղարքունիքի Ծովազարդ գյուղից է, մեկ ամսից զորացրվելու է:
Առեղծվածային դեպք Երեւանում. մայրաքաղաքի տներից մեկի 62-ամյա բնակչին մահացած են գտել, իսկ մյուսին հոգեբուժարան են տեղափոխել: Արտակարգ իրավիճակների նախարարությունն ահազանգ է ստացել, որ բնակիչները չեն արձագանքում դռան թակոցներին եւ հեռախոսազանգերին: Դուռը բացելով՝ փրկարարները միջանցքի հատակին հայտնաբերել են 62-ամյա տղամարդու դի, իսկ ննջասենյակի մահճակալին՝ անօգնական վիճակում 81-ամյա կնոջ: Նրան հոգեբուժական կլինիկա են տարել:
Դեկտեմբերի 16-ին Արմավիրում տեղի ունեցած ողբերգական վթարից 5 օր անց հիվանդանոցում մահացել է 52-ամյա Սիմոն Խաչատրյանը: Հովտամեջի գյուղապետի տեղեկացմամբ՝ վթարի հետեւանքով մահացած նրա կնոջը պետք է հուղարկավորեին, բայց լուրն իմանալով՝ հետաձգել են. ամուսիններին միասին են հողին հանձնելու: Խաչատրյան ամուսինները երկու երեխա ունեին. որդին ծառայում է Արցախում: Հիշեցնենք, որ դեկտեմբերի 16-ին Վաղարշապատ-Արմավիր ավտոճանապարհին իրար էին բախվել Սերբիայի քաղաքացի Յուբիշա Ստանիսլավի Volvo բեռնատարը, ինչպես նաեւ Opel մակնիշի երկու եւ Volkswagen մակնիշի մի մեքենա: Volkswagen-ը, որում եղել են Խաչատրյանները, մի կողմ էր շպրտվել եւ հայտվել դաշտամիջով անցնող առվակի մեջ: Սերբ վարորդը կալանավորված է:
Վրաերթի ենթարկված տղամարդն օրեր անց մահացել է: Դեկտեմբերի 12-ին «Մերսեդես» մակնիշի ավտոմեքենան Երեւանի Հալաբյան եւ Մարգարյան փողոցների խաչմերուկում վրաերթի էր ենթարկել 79-ամյա տղամարդու, որը վնասվածքներով հիվանդանոց էր տեղափոխվել: Պետրոս Թագվորյանը, գիտակցության չգալով, մահացել է:
Վիեննայից «Զվարթնոց» օդանավակայան ժամանած օդանավն այսօր չի կարողացել վայրէջք կատարել եւ վերադարձել է Վիեննա: Պատճառը եղանակային վատ պայմաններն են եղել: «Զվարթնոց»-ից տեղեկացնում են, որ օդանավակայանի թռիչքուղում սահմանափակ տեսանելիություն է եղել: Եղանակային վատ պայմանների պատճառով սա չվերթ չընդունելու միակ դեպքն է Երեւանում:
Դոլարը շարունակում է էժանանալ, իսկ եվրոն նվազել է 500, ֆունտը՝ 600 դրամից: Արդյունքում դեկտեմբերի 21-ին դոլարի փոխարժեքը կազմել է 480 դրամ, եվրոյինը՝ 499, ռուբլունը՝ 7 դրամ 87 լումա, ֆունտինը՝ 592 դրամ:
Դեկտեմբերի 22-ին հանրապետության տարածքում սպասվում է առանց տեղումների եղանակ: Օդի ջերմաստիճանն առաջիկա օրերին էականորեն չի փոխվի: Երեւանում նույնպես վաղը տեղումներ չեն սպասվում: Մայրաքաղաքի բարձրադիր գոտիներում գիշերը կդիտվի -15-17, վաղը ցերեկը՝ -5-7 աստիճան ցուրտ, իսկ ցածրադիր գոտիներում՝ գիշերը՝ -18-20, ցերեկը՝ -5-7 աստիճան: