Հայաստանի Հանրապետությունում Բելառուսի դեսպանատան առջեւ այսօր` հունվարի 16-ին, տեղի է ունեցել բողոքի ակցիա Իսրայելի քաղաքացի Ալեքսանդր Լապշինին Բելառուսի կողմից Ադրբեջան արտահանձնելու մտադրության դեմ:
NEWS.am-ի թղթակիցը հաղորդում է, որ ակցիայի մասնակիցները դեսպանատան առջեւ վանկարկում էին «Ղարաբաղն Ադրբեջան չէ», «Մի սատարեք Ալիեւյան իշխանություններին» եւ ցանկանում էին հանդիպել դեսպանին եւ հանձնել բողոք-նամակ: Դեսպանը, սակայն, չիջավ, ու ցուցարարները ստիպված բողոք- նամակն ու պաստառները թողեցին դռան առջեւ եւ «Ամոթ, ամոթ» վանկարկումներով հեռացան:
ՀՅԴ երիտթեւից Արշակ Մեսրոպյանը NEWS.am-ի հետ զրույցում նշեց, որ ակցիան շարունակական է լինելու. «Դեսպանատանն ուղղված նամակում գրել ենք, որ Ադրբեջանի կողմից մարդու իրավունքների ոտնահարում է տեղի ունեցել: Եթե այս միջոցառումն արդյունք չտա, պատրաստվում ենք էլի քայլեր ձեռնարկել»:
Հիշեցնենք, որ 2011-2012թթ. Արցախ կատարած այցերից հետո Լապշինը հայտնվել էր Ադրբեջանի «սեւ ցուցակում», սակայն 2016թ. հունիսին նա ուկրաինական անձնագրով այցելել էր Ադրբեջան: Այնուհետեւ արդեն նա մի քանի քննադատական հոդված էր հրապարակել այդ երկրի իշխանությունների մասին: Ադրբեջանը միջազգային հետախուզում էր սկսել հայտնի բլոգերի դեմ «Պետական սահմանի մասին» օրենքը եւ միգրացիոն օրենսդրությունը խախտելու համար: Նման քրեական գործ է հարուցվում Արցախ այցելած քաղաքացիների դեմ:
Բելառուսի իրավապահները դեկտեմբերի 15-ին ձերբակալել են Լապշինին: Լրատվամիջոցները գրում են, որ Բելառուսի իշխանությունները ցանկանում են արտահանձնել բլոգերին:
