Բլոգեր Ալեքսանդր Լապշինի վերաբերյալ Բելառուսի դատախազության որոշման մասին չի հայտնվել ո՛չ ազգականներին, ո՛չ փաստաբաններին, ո՛չ Ռուսաստանի եւ Իսրայելի դիվանագիտական առաքելություններին:
Հիշարժան է, որ բելառուսական լրատվամիջոցներում որոշման ընդունման մասին ոչ մի հրապարակում չկա:
Մինսկում կալանավորված Ալեքսանդր Լապշինի Facebook-յան էջում նշված է, որ Բելառուսի գլխավոր դատախազի տեղակալ Ալեքսեյ Ստուկը հունվարի 17-ի երեկոյան «արդարացի որոշում» է ընդունել Լապշինին Ադրբեջանին արտահանձնելու անհրաժեշտության մասին:
«Դուք կարծում եք, որ որոշման մասին հայտնվե՞լ է: Ո՛չ: Ո՛չ ազգականներին, ո՛չ փաստաբաններին, ո՛չ Ռուսաստանի եւ Իսրայելի դիվանագիտական առաքելություններին: Այսինքն՝ հունվարի 17-ի երեկոյան լռելյայն ընդունել են, հունվարի 18-ին, ժամը 14.45-ին ֆաքսով լռելյայն ուղարկել են մեկուսարան: Միայն փաստաբանի համառության շնորհիվ հունվարի 18-ին ես եւ Ռուսաստանի ու Իսրայելի հյուպատոսությունները տեղեկացանք, որ այդպիսի որոշում կա: Փաստաբանին էլ այպիսի պատասխան էր տրվել. «Այո, արդեն որոշում կա, երեկ է ընդունվել: Կգնաք Լապշինի մոտ եւ մանրամասների մասին կիմանաք»: Դատախազը համարում է, որ Բելառուսի քրեադատավարական օրենսգրքով նախատեսված չէ որոշումը փաստաբանին տալը: Ավելին՝ որոշումը Սաշային փոխանցելիս, նրա մասին տեղեկություն չի եղել նույնիսկ Բելառուսի ԱԳ նախարարությունում, որին անմիջապես դիմել են Իսրայելի եւ Ռուսաստանի հյուպատոսները: Համենայնդեպս, Բելառուսի ԱԳՆ-ն չի հաստատել այդ որոշման ընդունման փաստը:
Բայց փաստաբաններն իրենց գործը արեցին, որոշման տեքստից ամենակարեւոր հանգամանքների քաղվածքներ են կատարվել: Մեղմ ասած՝ որոշումը տարակուսանք է հարուցում, քաի որ դրանում միանգամայն նոր հանգամանքներ են հայտնվել, որոնք չեն եղել արտահանձնման մասին հարցման մեջ:
Դրանց ո՛չ Սաշան է ծանոթացել ձերբակալվելիս, ո՛չ դրանք փաստաբաններն են դիտարկել՝ պաշտպանությունը գործնականում կույր կառուցելով (քանի որ Բելառուսի քրեադատավարական օրենսգիրքը, պարզվում է, չի նախատեսում պաշտպանի իրավունք՝ իմանալու, թե կոնկրետ ինչի մեջ են իր պաշտպանյալին մեղադրում՝ ահա քեզ հոդվածների համարները, եւ դրա համար շնորհակալ եղիր)»:
Դեկտեմբերի կեսին Լապշինը, որը նաեւ ՌԴ քաղաքացի է, Մինսկում ձերբակալվել էր Ադրբեջանի հարցումով, որտեղ նրան ԼՂՀ այցելության համար ընդգրկել էին «սեւ ցուցակում»։ Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ միջազգային հետախուզում էր սկսել «Պետական սահմանի մասին» օրենքի խախտման հոդվածով։
