Մի խումբ մտավորականներ պահանջում են տեղափոխել խորհրդարանական ընտրությունների օրը, քանի որ այդ օրը ապրիլյան քառօրյա պատերազմը տարելիցն է:

Այս առնչությամբ նրանք հայտարարություն են տարածել, որտեղ ասվում է.

«Հարգելի հայրենակիցներ,

2016թ. ապրիլի 1-ից 4-ը տեղի ունեցած քառօրյա պատերազմը հրաշեկ լիցքով անցավ ամեն հայի սրտով: Պատերազմը փաստեց նոր իրողություններ, որոնք մեզ ստիպեցին վերագնահատել վերջին 20 տարում ձեւավորված բազում համոզմունքներ: Այդ օրերին մենք տեսանք, թե ինչպես դրսեւորվեցին երիտասարդ հայ սերնդի բացաառիկ ոգեղեն հատկանիշները, ու երեւաց հայրենիքի հանդեպ՝ աշխարհասփյուռ  հայ ժողովրդի սիրո միահամուռ ալիքը:

Նշենք, որ ռազմական գործողությունները անսգող ուրվագծեցին նաեւ այն հանցանքներն ու թերացումները, որոնց պատճառով մենք ունեցանք պայծառ հայորդիների անդառնալի կորուստներ: Զոհված հայ հերոսների վիշտը սգաց համայն ազգը եւ այն թողեց մոխրացած կետ ամեն հայի սրտում: Այս տարի ապրիլ ամսի սկզբին տարելիցն է մեր կյանքի այդ դրամատիկ ջրբաժանի, սակայն պարզվում է, որ ապրիլի 2-ին նշանակված են ԱԺ համապետական ընտրություններ:

Փաստորեն պետական ինստիտուտի որոշումը կարող է վարագուրել հազարավոր անձնուրաց հայրենասերների հերոսությունը, քանի որ արդեն տասնամյակներ շարունակ ընտրական գործընթացները մեզանում վերը նշված ողջ դրականի ուղղակի հակադրությունն են եւ բացասականի գերխտացումը: Ժողովրդի հիշողության մեջ դրանք նույնանում են արդարացիության խախտման, ազգի ոգեղեն էությունը կոտրելու, միասնականությունը բզկտելու եւ իրար առճակատելու արատավոր երեւույթների հետ:

Դա մեր խորին համոզմամբ՝ արհամարհական վերաբերմունք է մեր սուրբ նահատակների հիշատակի հանդեպ: Վերը բերվածից ելնելով՝ Հոգեւոր Հայաստանը պահանջում է անհապաղ տեղափոխել ընտրությունների օրը այնպես, որ որեւէ կերպ այդ ժամկետը չնույնականանա քառօրյա պատերազմի հետ:

Հասմիկ Պապյան – օպերային երգչուհի, ՀՀ ժողովրդական արտիստ

Խաչիկ Չալիկյան – ռեժիսոր, դրամատուրգ

Եղիշե Պետրոսյան – երգահան, երաժիշտ

Ռուբեն Կարապետյան – պատմական գիտությունների դոկտոր, ՀՀ դեսպան

Վարդան Խաչատրյան – պատմաբան, ԵՊՀ դասախոս

Արեգ Նազարյան – «Ոստան Հայոց» ռոք խմբի հիմնադիր, «Կիլիկիա» նավի նավապետի ավագ օգնական

Արթուր Սարգսյան – Հաց բերող

Նշենք, որ այս առնչությամբ օրեր առաջ հայտարարություն է տարածել  նաեւ ՀԱԿ-ը՝ առաջարկելով տեղափոխել ընտրության օրը, եւ այն նշանակել ապրիլի 21-30-ին: