ՀԱԿ-ն ու «Համախմբումը» հայտարարում են, որ խորհրդարանական ընտրություններն ապրիլի 2-ին նշանակելը հակասահմանադրական է, սակայն դեռեւս չեն շտապում հետեւել ՀՀԿ-ի խորհրդին եւ այդ հարցով դիմել Սահմանադրական դատարան։
Երկու կուսակցություններից էլ NEWS.am-ի հետ զրույցում նշեցին, որ իրենք դեռ այդ հարցը քննարկում են:
«Մենք քննարկում ենք հարցը, սպասում ենք, թե ինչ արձագանք կլինի այլ քաղաքական ուժերից, հետո կորոշենք, այս պահին ոչինչ չեմ կարող ասել»,– ասաց «Համախմբում» կուսակցության փոխնախագահ Ստեփան Մարգարյանը։
ՀԱԿ խմբակցության քարտուղար Արամ Մանուկյանը նույնպես նշեց, որ հարցը դեռ քննարկում են:
Նշենք, որ ընտրությունների օրը հայտնի դառնալուց շուրջ 3 շաբաթ անց «Հայ ազգային կոնգրեսն» ու կուսակցության անդամ Էլինար Վարդանյանը պահանջեցին, որ ընտրությունների օրը փոխվի՝ պատճառաբանելով, որ ապրիլի 2-ին նշանակելը հակասում է ՀՀ Սահմանադրությանը, բացի դրանից՝ պետք է հարգել ապրիլյան պատերազմի զոհերի հիշատակը։ Նրանք պահանջում են ընտրությունները նշանակել ապրիլի 21-30-ի միջակայքում, ինչպես նախատեսված է 2005թ. ընդունված Սահամանդրությամբ, քանի որ 2015թ. ընդունված Սահմանադրության համապատասխան՝ 91–րդ հոդվածը, ըստ անցումային դրույթների, ուժի մեջ է մտնելու հաջորդ գումարման Ազգային ժողովի առաջին նիստի օրը։
Ընտրությունների օրը փոխելու պահանջով բաց նամակով պետական ատյաններին են դիմել նաեւ մի խումբ մտավորականներ։