2016թ. օգոստոսի 10-ին հիմնադրված «Գործարար» կուսակցությունը ոչ իշխանական, ոչ էլ ընդդիմադիր ուժ է. կուսակցության նպատակը տնտեսական առաջադիմական փոփոխություններն են: Այս մասին այսօր՝ հունվարի 24-ին, լրագրողներին ասաց կուսակցության անդամ Արմեն Գաբրիելյանը:
«Կենտրոնամետ կուսակցություն ենք՝ ոչ իշխանությանն ենք աջակցում, ոչ՝ ընդդիմությանը, սոցիալ-ժողովրդավարական կուսակցություն է, տնտեսական ուղղվածության, կոչ ենք անում վերջ տալ իշխանափոխության եւ նմանատիպ այլ կոչերին, մենք իրական լուծումներ ենք առաջարկում, մեր նպատակն է տնտեսությունը զարգացնել ոչ թե 2-3%-ով, այլ՝ 10-20%-ով»,- ասաց նա:
Կուսակցության խորհրդի անդամ Աննա Պետրոսյանը նշեց, որ կուսակցությունը չի ստեղծվել միայն խորհրդարանական ընտրություններին մասնակցելու համար:
«Կուսակցությունը հիմնադրվել է 2016թ. օգոստոսի 10-ին՝ ՏԻՄ ընտրություններից առաջ, Գյումրիում մասնակցել է ՏԻՄ ընտրություններին, այսինքն՝ միանգամյա կուսակցություն չէ: ՏԻՄ-ում բավականին գոհացնող արդյունքների է հասել՝ համեմատած երկար տարիներ գործող այլ կուսակցությունների հետ: Հունվարի 14-ին տեղի ունեցած արտահերթ խորհրդի նիստում որոշում է կայացվել մասնակցել ապրիլին կայանալիք խորհրդարանական ընտրություններին»,- ասաց նա:
Նորաստեղծ կուսակցությունը, սակայն, մեծ հույսեր չունի ընտրություններից: Արմեն Գաբրիելյանի կարծիքով՝ իրենք իրատեսորեն են գնահատում իրենց շանսերը:
«Մեր նպատակը հաղթելը չէ, քաջ գիտակցում ենք, որ դժվար է լինելու, փորձ ձեռք կբերենք հաջորդ ընտրությունների համար, ինչու ոչ՝ մեր ծրագիրը օրինակ կլինի ուրիշ քաղաքական ուժերի համար»,- մեկնաբանեց նա:
Իսկ ընտրություններին դաշինքով մասնակցելը չեն բացառում որեւէ ուժի հետ. «Այս պահին բանակցում ենք, բայց դաշինք չկա, կուսակցության խորհուրդը որոշում է կայացրել, որ առանձին ցուցակով մասնակցենք, բայց դաշինքը չի բացառվում»:
Կուսակցությանը չի վախեցնում դեռեւս անճանաչելի լինելը: Կուսակցության նախագահ Գեղամ Բաղդասարյանի խոսքով՝ քարոզարշավի ժամանակ այդ հարցը կլուծվի:
«Մեր ընտրազանգվածը հիմնականում գործարար եւ սոցիալական խավերն են, քանի որ սոցիալական ծրագրեր ենք իրականացրել, իսկ ճանաչման խնդիրը կլուծվի արդեն հանդիպումների ժամանակ»,- ասաց նա:
Կուսակցությունը դեռ վերջնական կարգախոս չունի, բայց, հավանաբար, ընտրություններին կմասնակցի «զարգացնել տնտեսությունը, գործել նորովի, արարել ոգով» նշանաբանով: