Աստանայում ավարտվել են Սիրիայի ճգնաժամի կարգավորման հարցով բանակցությունները։ Հանդիպման ավարտին Ռուսաստանի, Իրանի եւ Թուրքիայի պատվիրակությունները համատեղ հայտարարություն են ստորագրել։
Սակայն այսպես կոչված սիրիական «ընդդիմությունը» ոչ միայն հրաժարվել է ստորագրել եզրափակիչ կոմյունիկեն, այլ նաեւ դժգոհություն է հայտնել հայտարարության բովանդակության կապակցությամբ։ Այդուհանդերձ, զինված «ընդդիմության» անդամ Հիշամ Մարուան «ՌԻԱ Նովոստի»–ին ասել է, որ ընդդիմությունը փետրվարի 8-ին կքննարկի այդ հարցերը Ժնեւում։
ՄԱԿ–ում Սիրիայի մշտական ներկայացուցիչ Բաշար ալ Ջաֆարին, մեկնաբանելով Սիրիայի խնդրի կարգավորման մեջ Անկարայի դերը, հայտարարել է, որ Թուրքիան ասում է մեկ բան, անում բոլորովին ուրիշ բան։
«Թուրքիան ասում է մի բան, անում այլ բան։ Մենք պահանջում էինք, որ Սիրիան քաղաքացիական եւ աշխարհիկ պետություն լինի, դա էր պահանջում մեր պատվիրակությունը, սակայն թուրքական պատվիրակությունը եւ Սիրիայի զինված ընդդիմությունը մերժեցին այդ առաջարկը»,– ասել է նա Աստանայում Սիրիայի հարցով մամուլի ասուլիսի ժամանակ։
Սիրիայի կառավարության պատվիրակության ղեկավար Բաշար ալ Ջաֆարին «շատ ցավալի» է անվանել նույն սեղանի շուրջ ընդդիմադիր ուժերի հետ նստելու փորձը։ «Մեզ համար շատ ցավալի էր նույն սենյակում լինել սիրիացիների հետ, որոնց գործողությունները կախված են ուրիշ պետություններից, եւ որոնց համար նրանք աշխատում են։ Նրանցից ոմանք անգամ ահաբեկչական ակտեր են կատարել։ Այդուհանդերձ, մենք առաջին անգամ չենք հանդիպում։ Մենք արդեն դա արել ենք «Մոսկվա», «Մոսկվա 2» եւ Ժնեւի խորհրդակցությունների ժամանակ»,– ասել է նա։
Եզրափակիչ կոմյունիկեում ասվում է, որ Ռուսաստանը, Իրանն ու Թուրքիան որոշում են կայացրել Սիրիայում հրադադարի մշտադիտարկման մեխանիզմ ստեղծելու մասին։ Բացի այդ, նշվում է, որ Ռուսաստանը, Իրանն ու Թուրքիան պետք է ապահովեն Սիրիայում զինված ընդդիմության եւ ահաբեկիչների տարբերակումը։
