ԲՀԿ-ական պատգամավոր Աբրահամ Մանուկյանը դեռեւս որոշում չի կայացրել առաջիկա խորհրդարանական ընտրություններին մասնակցելու վերաբերյալ:
NEWS.am-ի հարցին՝ մասնակցելու է արդյոք ընտրություններին եւ եթե այո, ապա Գագիկ Ծառուկյանի ստեղծած դաշինքին է միանալու, Մանուկյանը պատասխանեց. «Դեռ պարզված չեն այդ հարցերը»:
Այլ հարցերի ԲՀԿ-ական պատգամավորը պատասխանել չցանկացավ:
Նշենք, որ Ծառուկյանի հեռանալուց հետո Աբրահամ Մանուկյանի եւ Նաիրա Զոհրաբյանի միջեւ հարաբերությունները, մեղմ ասած, ջերմ չէին: Թեեւ երկուսն էլ ակտիվորեն հերքում էին մամուլում տարածած լուրերը, թե անախորժություններ ունեն, 2016թ. դեկտեմբերին, երբ արդեն հայտնի էր, որ Գագիկ Ծառուկյանը մտադրություն ունի քաղաքականություն վերադառնալ, Մանուկյանը խոստովանել էր՝ «Ես ընդհանրապես չեմ ներում սխալ արած մարդկանց»:
Հետաքրքրական է, որ միեւնույն ժամանակ նա նշել էր, որ Ծառուկյանի վերադարձով ԲՀԿ-ի վարկանիշը մի քանի անգամ կբարձրանա: Թե ինչու այսքանից հետո Աբրահամ Մանուկյանը դեռեւս վերջնական որոշում չի կայացրել, հայտնի չէ: