«ՎիմպելԿոմ» ընկերության եւ Հայաստանում Beeline–ի ռազմավարությունն է աջակցել նախագծերին, որոնք օգնում են մարդկանց ավելի լավ ապրել։ Այսօր Երեւանում ընթանում է նման միջոցառում, որը կօգնի գտնել Եվրասիա տարածաշրջանում ուժեղ ստարտափները։ Այս մասին հունվարի 25-ին՝ Երեւանում Eurasia Mobile Challenge նորարարությունների միջազգային մրցույթի տարածաշրջանային եզրափակչի ժամանակ, ասաց Հայաստանում Beeline–ի տնօրեն Անդրեյ Պյատախինը։
«Մեզ համար մեծ պատիվ է, որ ընտրել են Հայաստանը, քանի որ այն, ինչ մենք այստեղ անում ենք, դուր է գալիս մարդկանց, դուր է գալիս մեր ղեկավարությանը, այլ երկրներին, եւ բոլորին հաճելի է ժամանել Հայաստան»,– ասել է նա՝ հավելելով, որ հավատում է, որ հայկական թիմերը դեպի Բարսելոն ուղեգրեր կնվաճեն։
«Ամեն դեպքում այսքան մարդիկ, որոնք եկել են մեր երկիր, որոնք պատմում են աշխարհում կատարվող իսկապես ամենանոր բաների մասին, ստարտափների մասին, թե ինչպես ֆինանսավորում գրավել, այս ամենը մեծ ավանդ է մեր երկրի ապագայի համար։ Դա կօգտագործվի, որպեսզի նոր ապրանքներ ստեղծվեն, որպեսզի մեր երկրում կյանքն ավելի հետաքրքրիր դարձնեն։
NEWS.am–ի հարցին, թե հնարավոր է արդյոք, որ Հայաստանում Beeline ընկերությունը հետաքրքրվի ստարտափներից մեկով, Պյատախինը պատասխանեց, որ նման տարբերակը բացառված չէ։ «Մեր աշխատակիցները նույնպես ներկա են միջոցառմանը, որպեսզի հասկանան, թե ինչ գաղափարներ կան, որոնք կարելի է կիրառել»,– ասել է նա՝ հավելելով, որ նպատակն է օգնել երիտասարդներին ֆինանսավորում ստանալու հարցում։
Նա նշեց, որ Բարսելոնում համաշխարհային եզրափակիչը, որին կմասնակցեն Եվրասիա տարածաշրջանից 3 թիմ, շատ կարեւոր է նրանով, որ թիմերն այնտեղ կարող են միջազգային ներդրողների գրավել։ «3 ուղեգիր, ամեն ինչ ազնիվ է, ինձ ժամանակին վերցրեցին»,– ասաց Պյատախինը։
Նշենք, որ «ՎիմպելԿոմ» ընկերության կազմակերպած մրցույթի նպատակն է գտնել բջջային, ֆինանսական եւ digital ծառայությունների ոլորտում թասրմ գաղափարներ։ Տարածաշրջանային եզրափակիչ փուլին մասնակցում են 8 երկրների 24 թիմեր։ Հաղթող թիմերը կհրավիրվեն Բարսելոնում Համաշխարհային բջջային կոնգրեսին (Mobile World Congress 2017) մասնակցելու, որը կկայանա 2017-ի փետրվարի վերջին։
