Փետրվարի 7–ին Պերմի «Ամկար» ֆուտբոլային ակումբն իր պաշտոնական էջում հայտնել է, որ երկկողմանի համաձայնությամբ խզել է պայմանագիրը Հայաստանի հավաքականի նախկին պաշտպան Ռոբերտ Արզումանյանի հետ:
NEWS.am տեղեկություններով, ֆուտբոլիստի աջ ծնկի վնասվածքը, որը նա ստացել էր նախորդ տարվա մայիսին, խանգարում է նրան մինչ օրս: Արզումանյանի վիրահատությունից հետո վերականգնողական ընթացքը սխալ էր ընթացել, որի հետեւանքով բարդություններ են առաջացել:
Դեկտեմբերին 31-ամյա ֆուտբոլիստը նախնական պայմանավորվածության եկավ Տուլայի «Արսենալի» հետ, սակայն պարզվեց, որ վնասվածքը չի լավացել եւ տեղափոխությունը չկայացավ: Այժմ Արզումանյանը պետք է անցնի նոր վերականգնողական փուլ եւ մինչեւ ամառ ոչ մի թիմի չի միանա:
Հիշեցնենք, որ Արզումանյանը 2 տարի առաջ էր միացել «Ամկարին», որի կազմում անցկացրել է 13 հանդիպում: Նախորդ մրցաշրջանն Արզումանյանը վարձավճարով անցկացրեց Կարագանդայի «Շախտյորում»:
Վերա Մարտիրոսյան