Արագածոտնի մարզում, այսօր՝ փետրվարի 27-ին, խոշոր ավտովթար է տեղի ունեցել. ժամը 10։00-ի սահմաններում Երեւան-Գյումրի ավտոճանապարհի 65-րդ կմ հատվածում Opel մակնիշի 34 ՏR 380 համարանիշի ավտոմեքենան ինքնավթարի է ենթարկվել: Այս մասին NEWS.am-ին հայտնեցին ՀՀ ոստիկանության Թալինի ոստիկանության բաժնից:

«Օպել»-ը դուրս է եկել հանդիպակաց երթեւեկելի գոտի, բախվել արգելապատնեշներին եւ գլխիվայր շրջվելով՝ հայտնվել ճանապարհի մեջտեղում։  Ոստիկանությունից հայտնեցին, որ ինքնավթարի հետեւանքով զոհեր կամ վիրավորներ չկան, իսկ մեքենայում միայն վարորդն է եղել: «Opel»-ի վարորդը բնակվում է Գյումրիում:

Shamshyan.com-ի փոխանցմամբ, Opel-ի վարորդն ասել է, որ մեկ այլ «Ջիպ» վթարային իրավիճակ է ստեղծել իր համար՝ դուրս գալով հանդիպակաց գոտի, եւ բախումից խուսափելու համար ինքը թեքել է մեքենայի ուղղությունը, ինչից հետո բախվել է արգելապատնեշներին եւ գլխիվայր շրջվել, իսկ վթարային իրավիճակ ստեղծած «Ջիպը», իրեն թողնելով անօգնական, հեռացել է վթարի վայրից։