«Իրավունք» թերթը գրում է. «Խոսակցությունները, թե Սեյրան Օհանյանը գնում-գալիս էր Գագիկ Ծառուկյանի մոտ, որպեսզի տեղավորվի վերջինիս ցուցակում, համառորեն տարածվում էին երկար ժամանակ: Սակայն օրերս Սամվել Բաբայանը հերքեց այդ լուրը, թե Ս. Օհանյանը բանակցել է Գագիկ Ծառուկյանի հետ: «Ինձ հայտնի չի եղել նման բանակցություն, չի էլ հետաքրքրել»,-ասել է Ս. Բաբայանը:

Սակայն «Ծառուկյան» դաշինքի մամլո պատասխանատու Իվետո Տոնոյանը հաստատել է, որ ինչ-ինչ հանդիպումներ եւ բանակցություններ տեղի են ունեցել. «Առ ժամանակ առաջ, այո, բազմաթիվ անգամներ Սեյրան Օհանյանը եղել է Գագիկ Ծառուկյանի մոտ՝ հանդիպման»:

Իվետա Տոնոյանը չի էլ հերքել, որ Օհանյանն առաջարկել է Ծառուկյանին միասին գնալ ընտրություններին, սակայն Ծառուկյանը մերժել է նրան եւ առաջարկել է խորհրդարանում հայտնվելուց հետո անդրադառնալ դրան:

Այստեղից կարելի է երկու հետեւություն անել՝ կամ Սամվել Բաբայանը ստում է, որ տեղյակ չի եղել բանակցություններից, կամ էլ Սեյրան Օհանյանը Սամվել Բաբայանից գաղտնի, կրկնակի խաղ է խաղացել՝ բանակցելով Ծառուկյանի հետ:

Հաշվի առնելով, որ Սամվել Բաբայանը, ինչպես ինքն է ասում, «սկզբից էլ այդ խաղի մեջ է եղել», այսինքն սկզբից էլ ղեկավարել է Սեյրան Օհանյանի եւ Վարդան Օսկանյանի գործողությունները, ապա քիչ հավանական է, որ Բաբայանը տեղյակ չի եղել Օհանյան-Ծառուկյան հանդիպումներից:

Հետեւաբար հարց է ծագում՝ ինչու է Բաբայանը փորձում սուտ ասել: Եվ ինչքանով դրանից հետո կարելի է հավատալ Բաբայանի այլ հայտարարություններին, որ, ասենք, «պարոն Քոչարյանը որեւէ առնչություն չունի դաշինքի հետ»:

Հիմա հավատա՞լ, թե՞ չհավատալ Սամվել Բաբայանի անկեղծությանը»:

Առավել մանրամասն՝ թերթի այսօրվա համարում