«Քաղաքացիական պայմանագիր» կուսակցության վարչության անդամ, «Ելք» դաշինքի 3-րդ հորիզոնական զբաղեցնող, ԱԺ պատգամավոր Նիկոլ Փաշինյանը վստահ է, որ պաշտպանության նախկին նախարար Սեյրան Օհանյանը չի կարող իր դիմաց նստել ու հայտարարել, որ բացի իրենց դաշինքից (Օհանյան-Րաֆֆի-Օսկանյան-խմբ)՝ բոլոր ուժերը վերահսկվում են իշխանությունների կողմից:
«Ինչ վերաբերում է Սեյրան Օհանյանի հայտարարությանը, ապա կարծում եմ՝ ցանկացած ոք, ով նման բնույթի հայտարարություն կանի մեր վերաբերյալ, նա պետք է դրա համար ներողություն խնդրի կամ հիմնավորի: Սեյրան Օհանյանը չի կարող իմ դիմաց նստել ու այդպիսի հայտարարություն անել»,-այսօր՝ փետրվարի 28-ին, մամուլի ասուլիսի ժամանակ հայտարարել է Նիկոլ Փաշինյանը:
«Ես խիստ կասկածում եմ, որ Սեյրան Օհանյանն այդպիսի քաղաքական համարձակություն կունենա՝ իմ առաջ նստել եւ ասել, որ ես վերահսկվում եմ իշխանությունների կողմից: Եթե նա այդ հայտարարությամբ նկատի է ունեցել նաեւ մեզ, բարոյականությունը թելադրում է ներողություն խնդրել դրա համար, հակառակ դեպքում պետք է գա ուղիղ եթերում նստի, ու խոսենք»,-ընդգծեց նա: