Հաջորդ խորհրդարանում իր տեղն ու դերը կունենա Հայ ազգային կոնգրեսը, որի հետ ՕԵԿ-ը պատրաստ է համագործակցել ամենատարբեր հարցերի շուրջ: Այս մասին այսօր՝ նոյեմբերի 11-ին, լրագրողների հետ հանդիպման ժամանակ ասաց ՕԵԿ խորհրդարանական խմբակցության ղեկավար Հեղինե Բիշարյանը: Նա նաեւ անդրադարձավ առկա քաղաքական իրավիճակին եւ նշեց, որ ներքաղաքական կյանքը թեւակոխել է ակտիվ փուլ, եւ ողջունեց քաղաքական ուժերի ակտիվ աշխատանքը:
«Ես կողմ եմ, որ երկրում լինի ուժեղ, ամուր ընդդիմություն»,- հայտարարեց պատգամավորը՝ հավելելով, թե ընդդիմությունն իր ակտիվությամբ դրդում է իշխանությանը լավ աշխատելուն: Հեղինե Բիշարյանը միաժամանակ հավելեց, որ բացառում է արտահերթ ընտրությունների անցկացումը, ինչի մասին հայտարարում է ՀԱԿ-ը:
«Չեմ պատկերացնում նման բան»,-նկատեց Բիշարյանը եւ հավելեց, որ իր քաղաքական կենսագրությունը թույլ է տալիս ասել, որ արտահերթ ընտրություններ չեն լինելու: