Շիրակի մարզի Արթիկի ոստիկանապետ Տիգրան Պետրոսյանը հերքում է մամուլում հրապարակված տեղեկությունն այն մասին, թե ինքը զբաղվում է Արթիկի բնակչության բռնի կուսակցականացմամբ, ստիպելով վերջիններիս անդամագրվել ՕԵԿ-ին: «Այդ լուրերը հերյուրանքներ են, բացարձակ չեն համապատասխանում իրականությանը: Ես, որպես ոստիկանապետ, իրավունք չունեմ քաղաքականությամբ զբաղվելու եւ չենք էլ զբաղվում»,-NEWS.am-ի թղթակցի հետ զրույցում հավաստիացրեց Տիգրան Պետրոսյանը: Հարցին, թե որքանով ինքը տեղյակ է, Արթիկում ընթանո՞ւմ է բնակչությանը բռնի ՕԵԿ-ացնելու գործընթաց, ոստիկանապետը բարկացած տոնով ասաց. «Դա մեզ չի հետաքրքրում, մենք զբաղվում ենք մեր առօրյա հոգսերով ու խնդիրներով: Վսյո այսքանով»: Ոստիկանապետն այնքան բարկացավ, որ առանց լսելու մեր հաջորդ հարցը՝ դրեց լսափողը:
Նշենք, որ ըստ մամուլի հրապարակումների, Արթիկում ընթացող ՕԵԿ-ացման գործընթացը համակարգում է անձամբ ՕԵԿ քվոտայով վերջերս միլպետ նշանակված Տիգրան Պետրոսյանը, ով սպառնում է անդամագրվելուց հրաժարվողներին: Նրա ճնշումների ներքո էլ, ըստ լուրերի, Արթիկի տարածաշրջանի գրեթե բոլոր գյուղապետերը ՕԵԿ-ական են դարձել:
Նկատենք, որ ՕԵԿ ղեկավարների մեծ մասը, մասնավորապես ՕԵԿ նախագահ Արթուր Բաղդասարյանը, Հեղինե Բիշարյանը, Արծրունի Աղաջանյանը, Հովհաննես Մարգարյանը արմատներով արթիկցի են:
