ՀՅԴ-ն իր ուղեգիծը չի փոխել թե՛ իշխանություն եղած ժամանակ, թե՛ ընդդիմություն եղած ժամանակ։ Այս մասին այսօր՝ մարտի 18-ին, լճաշենցիների հետ հանդիպմանը հայտարարել է ՀՅԴ Բյուրոյի անդամ Կիրո Մանոյանը:
«ՀՅԴ-ն ցույց է տվել, որ միակ կուսակցությունն է, որ ինչքան վստահության քվե ստացել է ժողովրդից, փորձել է իր ծրագրերն իրականացնել: ՀՅԴ-ն իր ուղեգիծը չի փոխել թե՛ իշխանություն եղած ժամանակ, թե՛ ընդդիմություն եղած ժամանակ: Դաշնակցությունը երբեք ինքնանպատակ չի եղել իշխանություն, ոչ էլ՝ ինքնանպատակ ընդդիմություն»,- ասել է Մանոյանը:
Չնայած իշխանության հետ դաշնակից լինելուն՝ Մանոյանն ասել է, որ այդուհանդերձ, ՀՀԿ-ի հետ ունեն տեսակետների տարբերություն՝ ԼՂՀ խնդրի կարգավորման հետ կապված: «Չենք ընդունում Մադրիդյան սկզբունքները, չենք ընդունել հայ-թուրքական արձանագրությունները»,- ասել է Մանոյանը։
Նա նշել է , որ ՀՅԴ-ի համար երկրի ներսում չկան թշնամիներ, կան մրցակիցներ եւ ընդդիմախոսներ, եւ իրենք պատրաստ են համագործակցել այն բոլոր ուժերի հետ, որոնց հետ կունենան ընդհանուր հայացքներ:
Ըստ Մանոյանի՝ այսօրվա գործող քաղաքական ուժերից ՀՅԴ-ն միակն է, որ իսկապես սոցիալիստական կուսակցություն է, եւ իրենց նպատակներից մեկն է երկրի հարստության արդար բաշխումը ժողովրդի մեջ: «Կարեւոր չէ, թե ինչ է ասվում, կարեւորն այն է, թե ով է ասում: Կարեւոր է, որ դուք գիտակցեք, թե ում եք ընտրելու: Այդ կաշառքը հետո ձեզնից են վերցնելու, թող բոլոր վերցնողները վստահ լինեն, որ, կաշառք վերցնելով, ապագա հինգ տարում հարյուրապատիկ հետ են տալու: Ափսոս է, որ մենք այդպես ժողովրդին սովորեցնենք, որ մարդիկ փողով գան, ընտրվեն»,- ասաց նա:
