American Airlines ավիաընկերությունը Սան Ֆրանցիսկոյում մանկասայլակի պատճառով ուղեւորների հետ վիճաբանությունից հետո ժամանակավորապես հեռացրել է աշխատակցին: Այս մասին գրում է BBC-ն:
Չվերթի ուղեւորներից մեկը տեսանյութ է հրապարակել, որում երեւում է, թե ինչպես է ավիաընկերության աշխատակիցը գրեթե սպառնում ուղեւորներից մեկին եւ կոպտում: Տեսանյութի հեղինակ Սուրեյն Ադյանտայան պարզաբանել է, որ տեսագրությունը սկսելուց առաջ աշխատակիցն ուժով վերցրել է կնոջ երեխայի մանկասայլակը՝ հարվածելով նրան:
Տեսագրությունում երեւում են երեխային գրկած արտասվող կինն ու անձնակազմի մի քանի անդամներ, ինչպես նաեւ ուղեւորներ, որոնք փորձում են միջամտել կոնֆլիկտին:
Օդանավը Սան Ֆրանցիսկոյից Դալլաս էր ուղեւորվում: Կինը երեխայի հետ այլ չվերթով է Դալլաս մեկնել: Ավիաընկերությունը կնոջն ու նրա ընտանիքին առաջին կարգով է ճանապարհել: