Երեւանի քաղաքապետ, քաղաքապետի թեկնածու Տարոն Մարգարյանը ծանոթ չէ քաղաքապետի թեկնածու Նիկոլ Փաշինյանի հայտարարությանը՝ քաղաքապետարանը ՀՀԿ-ականներից ազատագրելու վերաբերյալ: Այսօր՝ ապրիլի 23-ին, Երեւանի Մալաթիա-Սեբաստիա վարչական շրջանում ընտրողների հետ հանդիպումից հետո լրագրողների հետ զրույցում նա նշեց, որ առաջին անգամ է լսում, որ Նիկոլ Փաշինյանը նման հայտարարություն է արել:
«Ճիշտն ասած չեմ լսել նման հայտարարություն, բայց թող փորձեն, բայց նաեւ հասկանան՝ ժողովուրդն արդյոք համաձայն է, թե ոչ: Ինձ համար շատ կարեւոր է մեր երեւանցիների կարծիքը, ոչ թե իրենց: Երեւանցիները պետք է որոշեն, թե ում են վստահում, ում ծրագրին են հավատում»,-ասաց նա:
Տարոն Մարգարյանը նաեւ նշեց, որ այս պահին անիրատեսական է համարում Նիկոլ Փաշինյանի՝ Աջափնյակում մետրոյի կայարան կառուցելու վերաբերյալ խոստումը, քանի որ այժմ ավելի առաջնային խնդիրներ կան:
«Իսկ դուք հավատու՞մ եք: Ես տեղական ինքնակառավարման մարմիններում գրեթե 10 տարուց ավելի է աշխատել եմ, լավ տիրապետում եմ քաղաքային տնտեսությանը եւ այսօր մենք շատ ուսումնասիրություններ ենք կատարել, նաեւ մետրոյի կայարաններ ավելացնելու վերաբերյալ: Դրա համար շատ միջոցներ են անհրաժեշտ, հետագայում, երբ մեր քաղաքացիների առաջնային խնդիրները լուծենք՝ անպայման դրա մասին էլ կմտածենք»,-ասաց նա:
